Qarjy mınıstrliginiń Memlekettik kirister komıteti kedendik ákimshilendirýdi sıfrlandyrý jáne jańǵyrtý sheńberinde, 2020 jylǵy 15 qyrkúıekten bastap Komıtette "Elektrondyq deklarasııalaý ortalyǵy" pılottyq jobasy iske qosylǵanyn habarlady, dep jazady Egemen.kz.
Pılottyq jobanyń maqsaty taýarlardy ishki tutyný úshin rásimdeý kezinde Komıtettiń qurylymdyq bólimshesi deńgeıinde kedendik ózge de qujattardy jáne (nemese) málimetterdi tekserý nysanynda, kedendik baqylaýdy barynsha ortalyqtandyrý arqyly kedendik ákimshilendirý deńgeıin arttyrý.
"Pılottyq jobada kedendik qundy anyqtaýyna, taýarlardy jikteýdiń durystyǵyna,sondaı-aq jeńildikter men bosatýlar berýdiń zańdylyǵyna qujattyq baqylaý júzege asyrylady. Bul rette tekserý úshin, qajetti qujattar men málimetterdi syrtqy ekonomıkalyq qyzmetke qatysýshylar Astana-1 AJ arqyly usynady", delingen aqparatta.
Birinshi kezeńde Aqmola, Atyraý, Qostanaı jáne Soltústik Qazaqstan oblystary boıynsha Memlekettik kirister departamentteriniń keden beketteri pılotqa qosyldy. Aldaǵy ýaqytta basqa aýmaqtyq memlekettik kirister organdaryn birtindep qosý josparlanýda.
Elektrondy deklarasııalaý ortalyǵynda rásimdeýdiń artyqshylyqtary:
- taýarlardyń kedendik qunyn baqylaý prosesi Komıteti deńgeıinde ortalyqtandyrý, bul baǵa saıasatymen qabyldanatyn sheshimderdiń birkelkiligine ákeledi;
- tekserýshi ýákiletti laýazymdy tulǵamen deklaranttyń baılanysy joıylý, óıtkeni barlyq ózara is-qımyl aqparattyq júıe arqyly tek elektrondyq nysanda júrgiziledi;
- syrtqy saýda júkteriniń logıstıkasyna arnalǵan shyǵyndardy ońtaılandyrý, sebebi taýardy deklarasııalaý úshin deklaranttyń ornalasqan jeri mańyzdy emes, bul rette taýarlar kez kelgen shekara mańyndaǵy termınaldarda ornalastyrylýy múmkin.