BAÁ men Túrkııadan qaıtqan 22 adam COVID-19-ǵa PTR test tapsyrýdan bas tartty. Dárigerler birneshe saǵat boıy kelgenderdi QR Bas memlekettik sanıtarlyq dárigeriniń qaýlysyn oryndaýǵa kóndirgen, dep habarlaıdy Egemen.kz elorda ákimdigine silteme jasap.
"22 adam bas tartty, avtobýsta otyrdy jáne kirgisi kelmedi. Biz kóndirýge tyrystyq, olar janjal shyǵaryp baǵynbady. Sebepteri ártúrli boldy. Túnge deıin túsindirgen soń, karantındik stasıonarǵa bir-birden kire bastady", deıdi "Ramada Plaza" karantındik stasıonarynyń dırektory Juldyz Danbaeva.
Narazylyq bildirýshilerdiń biri - 42 jastaǵy qala turǵyny. Ol synaq nátıjelerin kútkisi kelmeıtinin aıtyp, mekemeden ketýge tyrysqan. Polıseıler er adamǵa qatysty sharalar qabyldady.
"Er adam áıelimen jáne balasymen Túrkııadan ushyp keldi. Onyń otbasy barlyq prosedýralardan ótse de, ol taldaý nátıjelerin kútpeıtinin málimdedi jáne qashyp ketýge tyrysty. Polıseıler shara qoldandy", dep túsindirdi Juldyz Danbaeva.
Dárigerler mundaı jaýapsyz azamattar tek jaqyndarynyń ǵana emes, jalpy eldiń densaýlyǵyna qaýip tóndiredi dep eskertedi. Sondaı-aq, sanıtarlyq normalardy saqtamaǵany úshin, maska taqpaǵany úshin tártip buzýshylar ákimshilik jaýapkershilikke tartylady.
"Kóktemde bári osylaı bastaldy, eldiń túkpir-túkpirinen kelgender arqyly ınfeksııa keńinen tarap ketti. Osyndaı qarsylyq tanytqandar basqa azamattarǵa, jaqyndaryna, týystaryna qaýip tóndiredi", deıdi dáriger.
Esterińizge sala keteıik, 5 qazannan bastap Qazaqstanda jańa shekteýler engizildi. Ekinshi sanattaǵy elderden keletin adamdar úshin termometrııa, saýalnama júrgizý, úsh táýlikten aspaıtyn koronavırýs testi týraly anyqtamanyń bolýy sııaqty mindetti talaptar belgilengen. Anyqtama bolmaǵan jaǵdaıda, shetelden kelgender COVID-19-ǵa zerthanalyq tekserý júrgizý úshin stasıonarda eki táýlikke deıin oqshaýlanady.