Elordada Nazarbaev Ýnıversıtetiniń ınnovasııalyq klasteriniń Fab Lab alańynda «TOM:Nur-Sultan» meıkatonynyń birinshi kezeńi bastaldy. 72 saǵattyq marafon barysynda 14 komanda múmkindigi shekteýli jandardyń ómirin jaqsartatyn qurylǵylardyń tájirıbelik úlgilerin usynady. О́nertabystar paıdalaný ońaı, óndirisi qarapaıym jáne qol jetimdi bolýy kerek, dep habarlaıdy Egemen.kz.
Úzdik ıdeıalar meıkatonnyń 13-16 qarasha aralyǵynda ótetin ekinshi kezeńine joldama alady.
«Meıkatonǵa 14 komanda qatysady. Olardyń 10-y ǵana ekinshi kezeńge óte alady. Baıqaý komıssııasy tańdaǵan jobalardy qatysýshylar bir aı ishinde onlaın rejımde pysyqtaıdy. Qarasha aıynda olar ázirlemelerin quzyretti qazylar alqasyna usynýy kerek», – deıdi «Astana jastary» jastar resýrstyq ortalyǵynyń jetekshisi Shyńǵys Tileýlın.
Sonymen birge jas ónertapqyshtarǵa prototıpteri jasalatyn múmkindigi shekteýli jandar keńes beredi. Habarlamada atap kórsetilgendeı, irikteýge «Qazaqstan múgedekter konfederasııasy» RQB qoǵamdyq birlestigi qoldaý kórsetti.
Sonymen qatar, toptarǵa ońaltý, hırýrgııa jáne IT salasyndaǵy mamandardyń keńesteri beriledi.
Aıta ketý kerek, is-sharanyń uıymdastyrýshylary elordalyq jastar saıasaty máseleleri basqarmasy, «Astana jastary» jastar resýrstyq ortalyǵy, Nazarbaev ýnıversıtetiniń ınnovasııalyq klasteriniń Fab Lab, Tel-Avıv Ýnıversıtetiniń dostar qaýymdastyǵy.