Jambyl oblysynyń ákimi Berdibek Saparbaevtyń tapsyrmasy boıynsha Taraz qalasynyń ákimdigiqalada epıdemıologııalyq talaptardy saqtaý jáne qyzmetin bastaýǵa daıyn kásiporyndarda tekserý jumystaryn júrgizý sharalary kúsheıtilgenin málimdedi, dep habarlaıdy Egemen.kz.
Aldaǵy ýaqyttarda Taraz qalasynyń aýmaǵynda koronavırýstyq ınfeksııany taratpaý, azamattardyń jeke qorǵanysh quraldaryn paıdalaný jáne jumys rejımin saqtaý, dezınfeksııalyq quraldarmen qamtamasyz etý jáne profılaktıkalyq jumystardy júrgizý maqsatynda 12 mobıldi top qurylatyn bolady.
Atalǵan monıtorıngtik top barlyq kásiporyndarda sanıtarlyq sharalardyń saqtalýy boıynsha tekserý jumystaryn júrgizedi. Qala ákimdiginiń málimetinshe, sanıtarlyq talaptardy óreskel buzý deregi anyqtalǵan jaǵdaıda monıtorıngtik top ákimshilik quqyqbuzýshylyq týraly hattama jasaý úshin quqyq qorǵaý organdaryn shaqyrady. Epıdemııalyq talaptar saqtalmaǵan jaǵdaıda aıyppul zańdy tulǵalar úshin 600 myń teńgeden astam qarajatty quraıdy.
Sonymen qatar, qala ákimdigi qalada sanıtarlyq talaptardy saqtamaǵan kásipkerlik nysandardyń, onyń ishinde toıhanalar men kafelerdiń jabylatynyn habarlaıdy.
«Meıramhanalar, kafeler, túngi klýbtar jáne basqa da kásipkerlik mekemeler sanıtarlyq talaptardy qatań saqtaýy tıis. Eger de, eskertý jasalǵannan keıin qaıtalap talaptardy buzý jaǵdaılary oryn alsa, kásipkerlik nysandaryn jabatyn bolamyz. Al, qala turǵyndary mindetti túrde maska rejımi men araqashyqtyqty ustaný kerek», delingen ákimdik habarlamasynda.
Atalǵan másele boıynsha Taraz qalasynda 10-11 qazan kúnderi kúndizgi jáne túngi reıd júrgizilgen bolatyn. Reıd barysynda 49 nysan tekserilip, karantın talaptaryn buzǵandarǵa hattama toltyryldy. Onyń ishinde, oblys ortalyǵyndaǵy «Grand roıal», «Ydyrys», «Sevınch», «Baq bereke» toıhanalary da bar. Sonymen qatar, oblys aýdandarynda da mobıldik toptar kúndizgi reıdte 100-den astam nysandardy aralap, túngi reıdte 80-nen astam kásipkerlik nysandaryn tekserdi.
Onyń ishinde meıramhanalar, kafeler men dúkender de bar.
Jambyl oblysy