Qaısybir ult ókilinen qazaq halqy jaıly suraı qalsańyz, eń aldymen onyń baýyrmaldylyǵyn, keńpeıildiligin, qonaqjaılyǵyn erekshe atap ótedi. Bul – ǵasyrlar boıy túrli ult pen ulysty jatsynbaı, baýyryna basyp, saıyn dalasyndaı keńpeıilimen qushaq jaıa qarsy ala bilgen halqymyzdyń keńdigi men kemeldiginiń, danalyǵy men daralyǵynyń aıǵaǵy. Jerimizdiń keńdigimen qatar peıilimizdiń keńdigi, yntymaq pen tatýlyqqa negizdelgen tirligimiz – álemge úlgi bolarlyq qundylyq.Alǵys aıtý kúni – osyndaı asyl qasıetterdi dáripteıtin, taǵdyr toǵystyrǵan túrli etnos ókilderiniń qazaq halqyna degen rızashylyǵyn bildiretin erekshe mereke.
Qazaqtaı shýaqty shańyraqtyń astynda kerege bolyp jaıylyp, ýyq bolyp shanshylǵan ulttardyń biri – orys halqy. Olar ulty basqa bolǵanymen, ózderin osy eldiń tól perzentindeı sezinip, qazaq halqynyń salt-dástúri men rýhanı qundylyqtaryna tereń qurmetpen qaraıdy. Qazaq tilin meńgerip, ulttyq taǵamdardy ázirlep, dástúrlerdi dáriptep, el ishindegi beıbitshilik pen kelisimge óz úlesin qosyp keledi. Osyndaı tatýlyq pen birliktiń jarqyn úlgisin kórsetip otyrǵan otbasylardyń biri, 19 túrli ulttyń ortaq mekenine aınalǵan Atyraý oblysy, Mahambet aýdanynyń turǵyndary – Tarabrınder áýleti.
1950 jyly Baqsaı aýylynda dúnıege kelgen Vladımır Tarabrın Máskeý qalasynda Otan aldyndaǵy áskerı boryshyn ótep kelgen soń PMK qurylys mekemesinde kranshy bolyp eńbek jolyn bastaıdy. Jyldar boıy adal eńbek etip júrgen shaǵynda taǵdyr ony ómirlik serigi Raısa Pavlovnamen tabystyrady. Chývashııa Respýblıkasynyń Cheboksary qalasynan sylaqshy mamandyǵyn meńgerip kelgen Raısa Pavlovna ekeýi shańyraq kóterip, eki qyz, bir ul tárbıelep ósirdi. О́kinishke qaraı, otaǵasy Vladımır osydan jeti jyl buryn dúnıeden ótti.
Alǵys antologııasy: Mereke máni nede?
Tarabrınder otbasyndaǵy tuńǵysh qyz Oksana 1972 jyly dúnıege kelgen. Búginde esimi bólek demeseńiz, qazaq tilinde erkin sóıleıtin, qazaqy bolmysty boıyna sińirgen jan. Ol O.Shonaev atyndaǵy orta mektepti támamdap, Cheboksary qalasyndaǵy joǵary oqý ornynda tehnık-elektrık mamandyǵyn ıgerdi. Eńbek jolyn týǵan jeri Mahambet aýdanynda bastap, 1993 jyly D.Tólenov atyndaǵy mektep-gımnazııaǵa fızıka-matematıka laboranty bolyp jumysqa qabyldandy.
– Balabaqshada orys tobynda, mektepte orys synybynda bilim alsaq ta, aınalamyzdaǵy jandardyń basym bóligi qazaqtar boldy. Qazaq balalarymen birge oınap ósken soń tildi úırený qıynǵa soqpady. Qyzdarym da qazaq tilinen olımpıadalarǵa qatysyp, júldeli oryndar aldy. Biz qazaq ultymen sińisip kettik. Qonaqjaılyq, úlkenge qurmet kórsetý sııaqty qasıetterdi boıymyzǵa sińirdik. Ujymda da meni ózge ult dep bólmeı, óz qyzdaryndaı qabyldady. Qazaq halqynyń darhan peıiline rızamyz, – deıdi Oksana.
2001 jyldan beri mektep dırektorynyń sharýashylyq jónindegi orynbasary qyzmetin abyroımen atqaryp keledi. 28 jasynda Nıkolaı esimdi azamatpen shańyraq kóterip, eki qyz tárbıelep ósirdi. Úlken qyzy Vıktorııa Almaty qalasynda joǵary bilim alyp, qyzmetke ornalasqan. Kenje qyzy Darıa – Atyraý ýnıversıtetiniń stýdenti.
Alǵys aıtý merekesi Almaty oblysynda da keń kólemde ataldy
Tarabrınder áýletiniń qazaq halqymen týystyq baılanysy ekinshi qyzdary Natashanyń mahambettik Rýslan esimdi azamatqa turmysqa shyǵýymen nyǵaıa tústi. Bul – ulttar arasyndaǵy dostyqtyń týystyqqa ulasqan jarqyn kórinisi. О́mirge úsh perzent ákelip, búginde nemere súıip otyr. Rýslan ómiriniń sońyna deıin aýdandyq vetstansııada eńbek etti. Al Natasha 2002 jyldan beri D.Tólenov atyndaǵy orta mektepte is júrgizýshi bolyp qyzmet etedi.Otbasynyń kenjesi Oleg te týǵan jerinde eńbek etip júrgen azamat. Áskerı boryshyn ótep, slesar mamandyǵyn meńgergen ol búginde adal eńbegimen el ıgiligine úles qosyp jatyr.
Alǵys aıtýǵa asyǵaıyq!
Alǵys aıtý kúni – osyndaı taǵdyrlar toǵysynan týǵan dostyq pen rızashylyqty eske alatyn mereke. «Birlik bar jerde – tirlik bar» degen halqymyzdyń naqyly Tarabrınder sekildi otbasylardyń ómirinen aıqyn kórinedi. Olar qazaq jerin Otanym dep tanyp, elimizdiń ósip-órkendeýine aıanbaı eńbek etip keledi. Táýelsiz elimizdiń basty jetistikteriniń biri – tatýlyq pen kelisim. Bir shańyraq astynda tatý-tátti ǵumyr keship jatqan túrli ult ókilderiniń qazaq halqyna degen alǵysy men rızashylyǵy – beıbit ómirdiń aıǵaǵy.