Semeı qalasynda «Elimaı» fýtbol klýbynyń 2026 jylǵy maýsymynyń resmı tanystyrylymy boldy. Is-shara aıasynda klýbtyń negizgi quramy, áıelder komandasy, fýtbol ortalyǵynyń tárbıelenýshileri, jattyqtyrýshylar shtaby, sondaı-aq 2026 jylǵy maýsymǵa arnalǵan jańa oıyn jáne jattyǵý formalary tanystyryldy, dep habarlaıdy Egemen.kz
Aıtýly jıynǵa Abaı oblysy ákiminiń orynbasary Meıirlan Rahanov, «Elimaı» FK basqarma tóraǵasy Asqar Uranhaev, KAZ Minerals Toby basqarma tóraǵasynyń orynbasary Eldar Mamedov, fýtbol ardagerleri men jankúıerler qatysty.
Komandanyń bas bapkeri Andreı Karpovıch klýbtyń jańartylǵan quramyn tanystyryp, aldaǵy maýsymǵa qatysty suraqtarǵa jaýap berdi. Sonymen qatar ol Abaı oblysynyń ákimi Berik Ýálıge jáne KAZ Minerals kompanııasyna alǵysyn bildirdi.
«Atalǵan kompanııa klýbtyń seriktesi retinde kompanııa jumys isteıtin óńirlerde sport pen áleýmettik bastamalardy júıeli túrde qoldap keledi. «Elimaı» FK-men seriktestik fýtbol ınfraqurylymyn damytýǵa, jas sportshylardy qoldaýǵa jáne salaýatty ómir saltyn nasıhattaýǵa baǵyttalǵan», dedi bas bapker.
Is-shara barysynda jasóspirimder jáne balalar fýtbolyn damytýǵa erekshe nazar aýdaryldy. Uıymdastyrýshylar «Elimaı» fýtbol ortalyǵy Abaı oblysynyń jańa býyn sportshylaryn tárbıeleıtin mańyzdy alańǵa aınalyp kele jatqanyn atap ótti. Búginde klýb tek sporttyq joba ǵana emes, sonymen qatar óńirdiń qoǵamdyq jáne mádenı ómiriniń bir bóligine aınaldy.
«Elimaı» FK-nyń jańartylǵan quramynyń tanystyrylymy – Abaı oblysy úshin jańa fýtbol dáýiriniń bastalǵanyn shynaıy sezinetin erekshe sát. Búginde klýbtyń aınalasynda aıryqsha energııa, úlken úmit jáne jankúıerlerdiń shynaıy qyzyǵýshylyǵy qalyptasyp otyr. Bul zańdylyq. О́ıtkeni bıyl «Elimaı» múlde jańa deńgeıge kóterilip keledi – Premer-lıganyń favorıtteriniń biri ári Konferensııa lıgasynyń irikteý kezeńine qatysýshy klýb retinde. Biz úshin bul jaı ǵana klýbty qoldaý emes. Búginde KAZ Minerals «Elimaıdy» strategııalyq seriktes retinde qoldap qana qoımaı, klýbty damytý men basqarý prosesterine de belsendi qatysyp otyr. Maqsatymyz – uzaq merzimdi ári turaqty fýtbol jobasyn birge qalyptastyrý. Bul adamdardy biriktiretin, balalarǵa shabyt beretin jáne óńirge maqtanysh syılaıtyn aýqymdy jumys», dedi Eldar Mamedov.
KAZ Minerals Toby basqarma tóraǵasynyń orynbasary jáne strategııalyq jobalar jónindegi dırektorynyń aıtýynsha, alda jańa akademııalar ashylyp, balalar seksııalary kóbeıedi, al jasóspirimderde bir kúni «Elimaı» sapynda alańǵa shyǵý armany paıda bolady.
«Komandaǵa jarqyn maýsym, ádemi oıyn, minez jáne úlken jeńister tileımiz. Eń bastysy – fýtboldy shynaıy tiri etetin jankúıerlermen baılanysty joǵaltpaý. Biz osy tarıhtyń bir bóligi bolǵanymyzǵa qýanyshtymyz jáne búkil oblyspen birge jańa matchtar men jańa emosııalardy kútemiz», dedi ol.
Rasynda «Elimaı» FK klýb aınalasyna óńirdiń ár býyn ókilderin biriktirip, jankúıerlermen baılanysty nyǵaıtýdy jáne Semeı fýtbolynyń jańa tarıhyn jazýdy jalǵastyryp keledi.