Qyrǵyz Respýblıkasy Jogorký Keneshiniń tóraǵasy Marlen Mamatalıev Qazaqstanǵa alǵash ret resmı saparmen keldi. Májilis tóraǵasy Erlan Qoshanovpen kezdesýde taraptar parlamentaralyq yntymaqtastyqty nyǵaıtý máselelerin talqylady.
Mártebeli meımandy qarsy alǵan Erlan Qoshanov qazaq pen qyrǵyz halyqtaryn ortaq tarıh pen rýhanı-mádenı qundylyqtar, sondaı-aq ǵasyrlar boıǵy baýyrlastyq biriktiretinin atap ótti. Sondyqtan búgingi tańda eki el arasynda berik baılanys ornaǵan. Bizdiń halyqtarymyzdyń bolashaǵyn da bólip qarastyrýǵa bolmaıdy.
– Prezıdentterimiz Qasym-Jomart Toqaev pen Sadyr Japarovtyń saıası erik-jigeriniń, syndarly saıasatynyń arqasynda qarym-qatynasymyz qarqyndy damyp keledi. Memleketterimizdiń basshylary dostyqty bekemdep, birlese damý úshin qoldan kelgenniń bárin jasap jatyr. Yntymaqtastyqtyń odaqtastyq sıpatyn joǵary deńgeıdegi kezdesýler aıshyqtap otyr. Biz óz tarapymyzdan memleketterimizdiń basshylary arasyndaǵy ýaǵdalastyqtardy zańnamalyq turǵydan qamtamasyz etý úshin parlamentaralyq yqpaldastyqty odan ári nyǵaıtýǵa múddelimiz, – dedi Májilis spıkeri.
Sonymen qatar Erlan Qoshanov Parlamentaralyq yntymaqtastyq keńesiniń róli erekshe ekenine nazar aýdardy. Onda parlamentter basshylary deńgeıinde áriptestiktiń mańyzdy taqyryptary turaqty túrde kóterilip júr. Májilis tóraǵasynyń pikirinshe, eki el depýtattary týyndaǵan barlyq máseleni dostyq toptary men salalyq komıtetter deńgeıinde talqylaı otyryp, ýaqtyly sheshilýine eleýli úles qosyp keledi.
Áńgime barysynda taraptar TMD Parlamentaralyq assambleıasy, UQShU Parlamenttik assambleıasy, EQYU Parlamenttik assambleıasy jáne TúrkPA sııaqty kópjaqty parlamenttik alańdardaǵy tıimdi yntymaqtastyqqa da toqtaldy.
Erlan Qoshanov qyrǵyz áriptesine keıingi jyldary Qazaqstanda Prezıdent Qasym-Jomart Toqaevtyń bastamasymen júıeli túrde júzege asyrylyp jatqan aýqymdy saıası reformalar týraly málimet berdi. Osy baǵyttaǵy negizgi qadamnyń biri jalpyhalyqtyq referendýmda jańa Konstıtýsııanyń qabyldanýy jáne onyń qaǵıdattarynyń keıinnen Parlament qabyldaǵan zańdarda bekitilýi boldy. Atap aıtqanda, Jogorký Kenesh depýtattary «Prezıdent týraly», «Quryltaı jáne onyń depýtattarynyń mártebesi týraly», «Qazaqstan Halyq Keńesi týraly» jáne basqa da konstıtýsııalyq zańdardyń negizgi erejelerimen tanysty.
О́z kezeginde Marlen Mamatalıev qazaqstandyq áriptesterine qonaqjaılyǵy úshin alǵys aıtyp, aldaǵy tamyz aıyndaǵy Quryltaı depýtattarynyń saılaýyna daıyndyq júrgizý jáne ótkizý isine tabys tiledi.
Saýda-ekonomıkalyq yntymaqtastyqty sóz etken Qyrǵyzstan Parlamentiniń basshysy ekijaqty taýar aınalymynyń qazirgi serpinine qanaǵattanatynyn aıtyp, ındýstrııalandyrý, aýyl sharýashylyǵy, týrızm jáne «jasyl» energetıka salalaryndaǵy seriktestikti tereńdetý perspektıvalaryna toqtaldy.
Kezdesý barysynda taraptar zań shyǵarý salasynda tájirıbe almasýdy jáne óńir úshin ózekti máseleler boıynsha dıalogti jalǵastyrýǵa ýaǵdalasty. Atap aıtqanda, azyq-túlik qaýipsizdigi, sý jáne energetıka salalaryndaǵy yntymaqtastyq máseleleri qaraldy.
Ekijaqty yntymaqtastyqty nyǵaıtýdyń taǵy bir mańyzdy baǵyty retinde sıfrlandyrý jáne jasandy ıntellektini damytý jaıy aıqyndaldy. Erlan Qoshanov ol úshin Qazaqstan men Qyrǵyzstannyń qajetti quqyqtyq jáne ınstıtýsıonaldyq negizi daıyn ekenin atap ótti. Eki elde de Sıfrlyq kodeks qabyldanyp, jasandy ıntellektige negizdelgen ınnovasııalyq jobalar memlekettik organdardyń jumysyna belsendi túrde engizilip jatyr. Bul rette taraptar osy salada da tájirıbe almasýǵa kelisti.
Qyrǵyz Parlamenti delegasııasynyń baǵdarlamasynda resmı kezdesýlerden bólek, «Alem.ai» jasandy ıntellekt ortalyǵyna, «Astana» halyqaralyq qarjy ortalyǵyna barý jáne elordadaǵy mádenı nysandardy aralaý josparlanǵan.