Ulttyq bank júrgizgen saýalnama nátıjesi boıynsha, 2026 jyldyń birinshi toqsanynda eldegi nesıege suranys birqatar baǵytta tómendegen. Ásirese ıpoteka men avtonesıe segmentinde belsendilik báseńdegeni baıqalady, dep habarlaıdy Egemen.kz.
Ulttyq bank málimetinshe, iri bıznes tarapynan kredıttik ótinimder sany toqsandyq kórsetkishpen 16 paıyzǵa ósip, 238-ge jetken. Sonymen qatar ótinimderdiń ortasha kólemi 18,8 mlrd teńgeni quraǵan. Bankter muny strategııalyq jobalardy qarjylandyrýǵa qyzyǵýshylyqtyń artýymen baılanystyrady.
Ulttyq banktiń Qarjylyq turaqtylyq jáne zertteýler departamentiniń dırektory Oljas Kýbenbaevtyń aıtýynsha, orta jáne shaǵyn bıznes segmentinde suranys birshama azaıǵan. Buǵan memlekettik qoldaý baǵdarlamalary aıasyndaǵy qarajatty ıgerý jáne jyl basyndaǵy maýsymdyq faktorlar áser etken.
Tabysynan 8 ese kóp qaryzy barlarǵa nesıe berilmeıdi: Ulttyq bank jańa shekteý engizedi
Shaǵyn kásipkerlik salasynda ótinimder sany 5 paıyzǵa tómendep, 912 myń bolǵan. Orta bıznes boıynsha kerisinshe ótinimder kólemi sıfrlyq ónimderdiń esebinen 5 paıyzǵa artqan.
Ipotekalyq nesıege suranys ta tómendegen. Bankterdiń aıtýynsha, oǵan syıaqy mólsherlemesiniń kóterilýi jáne turǵyn úıdi paıdalanýǵa berý kóleminiń azaıýy sebep bolǵan. Nátıjesinde ıpotekalyq ótinimder sany 21 paıyzǵa qysqaryp, 191 myńǵa jetti. Ortasha qaryz kólemi 20,5 mln teńgeni quraǵan.
Avtonesıe naryǵynda da belsendilik báseńdegen. Bul jańa kólik baǵasynyń arzandaýy jáne avtodılerler usynatyn jeńildetilgen baǵdarlamalarǵa suranystyń azaıýymen túsindirildi. Avtonesıe boıynsha ótinimder sany 20 paıyzǵa azaıyp, 1,2 mln bolǵan.
Qazaqstan krıptohabqa aınalady: Prezıdent Úkimet pen Ulttyq bankke shuǵyl tapsyrma berdi
Sonymen qatar kepilsiz tutynýshylyq nesıelerge suranys aıtarlyqtaı ózgermegen. Bul segmentte ótinimder sany 16,1 mln deńgeıinde saqtalǵan.
2026 jyldyń ekinshi toqsanynda bankter iskerlik belsendiliktiń artýyna baılanysty iri bıznes tarapynan nesıege suranys ósedi dep kútedi. Al ıpotekalyq naryqta da suranystyń qaıta jandaný yqtımaldyǵy bar.