Almaty qalasynda ornalasqan Hilton qonaqúıinde qyzmetkerlerdi ǵımarattan kúshtep shyǵarý áreketi júrip jatqany týraly aqparat tarady. Bul týraly Májilis depýtaty Ermurat Bapı Bas prokýror Berik Asylovqa joldaǵan depýtattyq saýalynda aıtty, dep habarlaıdy Egemen.kz.
Depýtattyń málimetinshe, qonaqúıde 250-ge jýyq adam jumys isteıdi.
«Almaty qalalyq ádilet basqarmasynyń sheshimimen, Almatyda Hilton qonaqúıin menshik ıesinen tartyp alý, ǵımaratty kúshtep bosatý áreketteri júrip jatyr. Osy áreketterdiń bári shetelden kelgen qonaqtardyń kóz aldynda júrip jatyr», dedi Ermurat Bapı.
Bul istiń artynda «eski» Qazaqstannyń múddesine jasalyp jatqan zańsyz, ádiletsiz, áreketter bar ekendigin atap ótken depýtat buǵan deıin de atalǵan qonaqúıge qatysty másele kóterilgenin eske saldy. Onyń aıtýynsha, bul aktıv buryn Qaırat Satybaldyulyna qatysty is boıynsha memleketke qaıtarylǵan bolatyn.
«Osy aralyqta Qaırat Satybaldy túrmege otyryp, keıin bosap shyqty. Biraz aktıvin memleketke qaıtardy, sonyń ishinde Hilton qonaqúıi de bar. Bul – aıla. Qonaqúıdi tartyp alyp, memlekettik múlik komıteti arqyly ony aýksıonǵa shyǵaryp, Satybaldyǵa astyrtyn tıesili kompanııaǵa satýdyń astyrtyn júıesi júzege asyp jatyr», dedi Ermurat Bapı Hilton-dy naryq boıynsha 12 mlrd teńge emes, 4,5 mlrd teńgege baǵalaǵanyn tilge tıek etip.
Qaırat Satybaldynyń qonaqúıi memleketke qaıtaryldy
Almatydaǵy qonaqúı tóńiregindegi zańsyzdyq Prezıdent Qasym-Jomart Toqaevtyń qulaǵyna jetetinine senim bildirgen depýtat Bas prokýratýradan bul jaǵdaıdy tekserip, quqyqtyq baǵa berýdi talap etti.
Eske sala keteıik, buǵan deıin Qaıtarylǵan aktıvterdi basqarý kompanııasy (KÝVA) Almatydaǵy Qaırat Satybaldyǵa tıesili Kaisar Plaza saýda-keńse ortalyǵyn satýǵa shyǵaratynyn habarlaǵan bolatyn.