Osydan bes kún buryn AQSh-ta ótken Regeneron ISEF 2026 álemdegi eń iri ǵylymı jobalar baıqaýynda jasandy ıntellekt kómegimen qaterli isikti anyqtaý júıesin ázirlegen qazaqstandyq oqýshy marapatqa ıe bolǵan edi. Búgin qazaqstandyq oqýshylardyń taǵy eki jobasy jasandy ıntellekt salasyndaǵy jetekshi halyqaralyq uıymdardyń biri Association for the Advancement of Artificial Intelligence, qysqasha AAAI, arnaıy marapattaryna ıe boldy, habarlaıdy Egemen.kz
KazLib jobasy akademııalyq josparlaý jáne oqý úlgerimin modeldeýge arnalǵan sıfrlyq platforma retinde AAAI Student Membership marapatyn aldy. Jobanyń avtorlary Taldyqorǵan qalasyndaǵy «Bilim-Innovasııa» mamandandyrylǵan lıseı-ınternatynyń oqýshylary Aslan Basharov pen Bolysbaı Nurkeldi.
️Ekinshi joba Neuralese neırondyq jelilerdi ázirleýge arnalǵan vızýaldy-ınteraktıvti platforma retinde birden eki arnaıy marapatqa ıe boldy. Olar AAAI Membership jáne School Library Membership marapattary. Jobany Almaty qalasyndaǵy Panfılov atyndaǵy №54 Qazaqstan-Reseı mektep-lıseıiniń oqýshylary Mıhaıl Isakov pen Rahım Nurmuhanbetov usyndy.
️Jańa marapattar qazaqstandyq oqýshylardyń joǵary daıyndyq deńgeıin jáne elimizdiń jasandy ıntellekt pen sıfrlyq ınnovasııalar salasyndaǵy áleýeti artyp kele jatqanyn taǵy bir márte dáleldedi. Búginde qazaqstandyq oqýshylar álemdegi eń iri ǵylymı jarystarǵa qatysyp qana qoımaı, olardyń jobalary halyqaralyq sarapshylar qaýymdastyǵy tarapynan joǵary baǵalanyp, otandyq bilimniń jahandyq deńgeıdegi básekege qabilettiligin kórsetip otyr.
️Aıta keteıik, Regeneron ISEF álemdegi eń iri oqýshylarǵa arnalǵan ǵylymı jáne ınjenerlik jobalar baıqaýy bolyp sanalady. Ol jyl saıyn ondaǵan elden úzdik jas zertteýshilerdi biriktiredi. Bıyl baıqaý AQSh-tyń Fınıks qalasynda ótti. Bıyl Qazaqstan atynan bes ǵylymı joba usynylyp, olardyń úsheýi halyqaralyq konkýrstyń arnaıy marapattaryna ıe boldy.