Bıyl oıda joqta bastalǵan indet barlyq memleketti tyǵyryqqa tiredi. Deregi belgisiz keselmen kúresip jatqandar qatarynda bizdiń de elimiz bar. Epıdemııa ýshyǵyp bara jatqan sátte qaterge halyq bolyp qarsy turdy. Jer-jerdegi eriktiler qınalǵan jandarǵa járdem berdi. Jastarymyz jantalasyp aýrýhanalarǵa ottegi ballondaryn, dári-dármekter tasydy. Ár jerde qaıyrymdylyq sharalary uıymdastyrylyp, emdeý mekemelerine qajetti qondyrǵylar jetkizildi.
Qıyn-qystaý kezeńde Syr boıynda kásipkerler men qarapaıym turǵyndar kómegimen aýrýhanalar men emhanalarda qat bolyp turǵan apparattar alyndy. Kópbalaly jáne áleýmettik jaǵdaıy tómen otbasylary da qaıyrymdylyqtan qur qalǵan joq. Oblys halqy emi tabylmaǵan keselge qarsy kúreste osylaısha eldik tanytty. Kóp jumylǵan jerde qandaı qıyndyqtyń da joly tabylatyny belgili ǵoı, birte-birte indettiń de aıasy tarylyp, el esin jıdy.
Biraq dál qazir óńirde jaqynyna janashyrlyq tanytatyn osyndaı úrdis saıabyrsyp qalǵandaı. Tipti keshegi kesel órshigen sátte tynym tappaǵan eriktiler komandasynyń da ekpini qazir onshalyqty sezilmeıdi. Jergilikti bılik tarapynan volonterlerdi baǵyttap otyrý da umyt qalǵan syńaıly.
Sońǵy bir-eki aı kóleminde osy baǵytta jekelegen aýdandardan ǵana jylt etken jaqsy jańalyqtar taýyp, gazetke jarııaladyq. Jańaqorǵan aýdanyndaǵy «Jańarǵan Jańaqorǵan jastary» eriktiler toby qaıyrymdylyq sharalaryn úzbepti. Qazalylyq jastar da ózara aqyldasyp, jaǵdaıy qıyn otbasylar úshin 2 úıdiń qurylysyn bastapty. Onyń bireýin bitirip, qınalǵan jandarǵa qýanysh syılasa, ekinshisiniń de qurylysy aıaqtalyp qaldy.
Biraq basqa aýdandarda mundaı jańalyqtar joqtyń qasy. Bir habar bola ma degen úmitpen, aýdan ákimdikterindegi, tıisti basqarmalardaǵy baspasóz qyzmetterine habarlastyq. Basqa jańalyqtan múdirmeıtin kópshiligi jaqynyna janashyrlyq tanytatyn sharalarǵa kelgende kúmiljip qoıa beredi. Suraǵan málimetimizdiń sońy sıyrquımyshaqtanyp kete beretinine qaraǵanda jergilikti bılik eriktiler qımylyn erikkenniń tirligi sanaıtyn sııaqty. Áıtpese júzdegen jastardy ıgilikti sharaǵa uıystyrýǵa bolady ǵoı.
Qazir óńirde kúrish oraǵy qyzyp turǵan shaq. Jazdaıǵy eńbektiń nátıjesin kórer kezeńniń basqa sharýaǵa moıyn burǵyzbaıtyny da ras. Onyń ústine habary sezilip turǵan basqa da saıası naýqandarǵa baılanysty qarbalas sharýa júrip jatqan bolar. Biraq bul Memleket basshysynyń bastamasymen qolǵa alynǵan Volonterler jylyna, «Jaqynyńa janashyr bol!» urany sheńberindegi sharalarǵa selqos qaraýǵa sebep bolmasa kerek. Salystyrǵandaı bolmaıyq, biraq ózge oblystar bul baǵytta bizden áldeqaıda ozyq tur. Al Syrdaǵy saıabyr tirliktiń sebebin kimnen suraımyz?!
Qyzylorda oblysy