Jýyrda Qyzylorda oblystyq polısııa departamentinde laýazymdy qyzmetkerlerdiń sybaılas jemqorlyqqa qatysy bar degen kúdikpen ustalǵandyǵy týraly sybys taraǵan edi. Departamenttiń baspasóz qyzmeti áýelgide bul habardy rastaǵan da, teristegen de joq. Kóp keshikpeı jurtty alańdatqan jaıdyń shyn habar ekendigi anyqtaldy.
Besinshi qazan kúni IIM О́zindik qaýipsizdik departamenti qyzmetkerleri Qyzylordaǵa arnaıy kelip, uıymdastyrylǵan operasııa barysynda oblystyq Polısııa departamenti Esirtki qylmysyna qarsy is-qımyl basqarmasynyń bastyǵy men osy qurylymnyń taǵy bir qyzmetkerin ustaǵan. Joǵary shendi qyzmetkerler alaıaqtyq jasady degen kúdikke ilinip otyr. Búginde ekeýi de ýaqytsha ustaý abaqtysyna qamaqqa alynyp, olarǵa QK-niń 190-babynyń 3-bóligimen sotqa deıingi tergep-tekserý amaldary júrgizilýde. Kúdiktilerge qatysty sońǵy sheshimdi kinásiniń dárejelerin anyqtaı otyryp sot shyǵarady.
El arasynda oblystyq Polısııa departamenti bastyǵynyń orynbasary men birqatar laýazymdy basshylar da qyzmetterinen bosatylǵany týraly áńgime taraǵan. Bul másele de anyqtaldy, oblystyq Polısııa departamentiniń bastyǵy Bektóre Sultan olarǵa qatysty qyzmettik tekserý júrgizilip jatqanyn habarlady.
– Departamenttiń О́zindik qaýipsizdik basqarmasy qyzmettik tártip pen zańdylyqty nyǵaıtý, jeke quram arasynda sybaılas jemqorlyqqa qarsy is-qımyl boıynsha keshendi sharalardy jalǵastyra beredi. Bolǵan jaǵdaıǵa baılanysty qyzmettik tergeý júrgizilýde. Zańbuzýshylyqqa qasaqana barǵandar qatań jazaǵa tartylady. Olarǵa bizdiń qatarymyzda oryn joq, – dedi oblystyq Polısııa departamentiniń bastyǵy.
Qyzylorda