Jańa ortalyq arqyly kásipkerler ózderine qajetti qyzmet túrlerin "Bir tereze" qaǵıdatyna saı ala alady. Endi munda oblystyq kásipkerlik palatasynyń, "Taraz" áleýmettik-kásipkerlik korporasııasynyń, "Taraz", "Atameken" shaǵyn qarjy uıymdarynyń, "KAZAKH INVEST" ulttyq kompanııasynyń, ekinshi deńgeıli bank menedjerleri, kásipkerlerdiń quqyǵyn qorǵaý boıynsha sarapshylyq toptyń ókilderi, memlekettik mekemelerdiń qyzmetkerleri qyzmet kórsetetin bolady, dep habarlaıdy Egemen.kz Jambyl oblysy ákiminiń baspasóz qyzmetine silteme jasap.
Jańa ortalyqtyń jumysymen oblys ákimi Berdibek Saparbaev, QR kásipkerleriniń quqyqtaryn qorǵaý jónindegi ýákil Rýstam Júrsinov, oblys prokýrory Nurǵalym Ábdirov, "Atameken" ulttyq kásipkerler palatasynyń basqarmasynyń múshesi, basqarma tóraǵasynyń keńesshisi Erbol Ústemirov tanysty.
"Prezıdent Qasym-Jomart Tokaev bıznestiń damýyna kedergilerdi azaıtý sharalaryn qolǵa alýdy tapsyrdy. Ol úshin barlyq múddeli taraptyń ózara jumysyn úılestirý kerek. Olar birlesip saladaǵy barlyq ózekti máselelerdi sheship, qarapaıym turǵyndardy memlekettik qoldaý sharalary týraly aqparattandyrǵany jón. Bizdiń maqsatymyz qaıtarymsyz granttar men shaǵyn nesıeler alǵan azamattardyń sanyn kóbeıtý bolyp otyr. Kásipkerlerdi óz máseleleri jaıynda ashyq aıtýǵa shaqyramyz.
Toqsan saıyn kásipkerlerdiń quqyǵyn qorǵaý boıynsha sarapshylyq keńestiń otyrysy ótkiziledi. Onda sizderdiń usynystaryńyz ben talap-tilekterińiz qaralady", – dep atap ótti oblys ákimi Berdibek Saparbaev.
"Bızneske arnalǵan memlekettik qyzmettiń san túrin usynyp, keńester berý, bıznes-jobalardy kásibı súıemeldeý jańa ortalyq jumysynyń negizgi baǵytyna jatady",–deıdi "Taraz" áleýmettik-kásipkerlik korporasııasynyń tóraǵasy Oljas Qarjaýov.
Memlekettik organdar basqa uıymdarmen birlesip, ınvestısııa tartýdyń biryńǵaı mehanızmin jasaıdy.
"Ortalyq ǵımaratynda kásipkerler úshin barlyq jaǵdaı jasalǵan. О́zine-ózi qyzmet kórsetý aımaǵy da bıznesmenderdiń "Elektrondyq Úkimet" portalyndaǵy qyzmetterge qoljetimdiligin qamtamasyz etedi. Ýaqyt óte munda usynylatyn qyzmettiń aýqymy da keńeıe beredi", – deıdi oblystyq kásipkerlik palatasynyń dırektory Samat Qosalıev.
Qazir mundaı ortalyq Almaty, Mańǵystaý, Túrkistan, Aqtóbe oblystary men Shymkent qalasynda jumys isteıdi.
Dál osy kúni Taraz qalasyndaǵy "Dostyq" úıinde kásipkerlerdiń quqyǵyn qorǵaý boıynsha sarapshylyq keńestiń keńeıtilgen otyrysy ótti. Keńes qatysýshylary óńirdegi bıznes ahýaldy jaqsartýǵa baǵyttalǵan sharalary men jergilikti jerde kásipkerlikti damytýǵa kedergi bolatyn ózekti máselelerdi talqylady.
Basqosý barysynda oblys ákimi Berdibek Saparbaev, Qazaqstan kásipkerleriniń quqyqtaryn qorǵaý jónindegi ýákil Rýstam Júrsinov, oblys prokýrory Nurǵalym Ábdirov kásipkerlik qoldaýdyń Jol kartasyna qol qoıdy.