Keshe Qazaly aýdandyq polısııa bóliminiń ýchaskelik ınspektorlary jedel profılaktıkalyq shara barysynda túngi saǵat 02:37 shamasynda «Dosqalı» eldi mekenine qaraı baǵyt alyp bara jatqan kúdikti motokólikti baıqaıdy.
Motokóliktiń izine túsken polıseıler kúdikti kólik ıesiniń bos turǵan ǵımarattyń ishine 20 qap kúrish jınap jatqanynyń ústinen túsedi. Teksere kelgende onyń bul kúrishti aýdandaǵy jaýapkershiligi shekteýli seriktestiktiń egistik alqabynan urlaǵany anyqtaldy. Jedel túrde júrgizilgen tekserý barysynda bul azamattyń dál osy alqaptan 3 kún qatarynan barlyǵy 110 qap kúrishti qoldy qylǵany belgili boldy.
Qazirgi tańda kúrish urlaǵan azamatqa qatysty Qazaqstan Respýblıkasy Qylmystyq kodeksiniń 188 – baby boıynsha sotqa deıingi tergep – tekserý amaldary júrgizilýde. Oǵan qatysty bultartpaý sharasyn qoldaný máselesi sheshilýde.