Bıylǵy jyl basynan beri Petropavlda 13 áıel ata-analyq quqyǵynan aıyryldy. Qazir 8 materıal qaralý ústinde, dep habarlaıdy Egemen.kz.
Osyndaı keleńsiz jaǵdaı jalǵasyn taýyp jatyr. Kúni búgin Petropavldyq ıývenaldyq polıseıler spırttik ishimdikke áýes 33 jastaǵy qala turǵynyn ata-ana quqyǵynan aıyrýǵa materıal jınaýda. Áıeldiń eki uly bar, biri 13 jasta, ekinshisi 7 aılyq sábı. Uqypsyz anaǵa qatysty buryn jınalǵan barlyq materıaldar kámeletke tolmaǵandardyń isteri jáne olardyń quqyǵyn qorǵaý jónindegi komıssııada qaralyp, ony ata-ana quqyǵynan aıyrý úshin sotqa materıal joldaý týraly sheshim qabyldandy. Jarty jyl buryn polıseıler oǵan jaǵdaıdy túzetýge múmkindik bergen. Sáýir aıynda turǵylyqty jeri boıynsha kezekti tekseris barysynda onyń úıinde bolmaǵany, jańa týǵan sábıdi úlken aǵasynyń qaraýyna qaldyryp, ózi bul ýaqytta ishimdik iship júrgeni belgili boldy. Sonymen qatar, ıývenaldyq polıseıler úıdi taza ustaı almaıtyndyǵyn kózimen kórgen. "Úıde ıttiń bolýy, tolyq antısanıtarııalyq jaǵdaı, taraqan, jýylmaǵan ydys-aıaqtar... Kámeletke tolmaǵan balalardy qaldyrý týraly akti toltyrylyp, balalar aýrýhanaǵa jatqyzyldy", delingen qaýlyda.
Áıeldiń ózi ata-analyq mindetterin oryndamaǵany jáne ózge de quqyq buzýshylyq jasaǵany úshin budan buryn birneshe ret ákimshilik jaýapqa tartylǵan.
"Profılaktıkalyq is-sharalarǵa qaramastan, ol ishimdik ishýin qoımaýda, usynymdardy oryndamaıdy, óziniń ata-analyq mindetterin tıisti atqarmaıdy. Kórshilerinen atalǵan azamatshanyń ishimdik ishetini, ádepsiz ómir saltyn ustanatyny jaıly shaǵym kelip túsýde", deıdi Petropavl qalasy PB ıývenaldyq polısııa tobynyń bastyǵy Elmıra Abýsheva.
Qazir onyń isi de sotqa tapsyrýǵa daıyndalýda. Ishimdikke aqsha tapqan adam balalaryn qaraýǵa múmkinshilik tappaǵan eken.
PETROPAVL