QR Premer-Mınıstri Asqar Mamın men AQSh saýda mınıstri Ý. Ross AQSh Saýda palatasynyń janyndaǵy Qazaqstan-Amerıka Iskerlik keńesiniń onlaın ashylý rásimine qatysty.
Úkimet basshysy Amerıka Qurama Shtattary Qazaqstannyń iri ekonomıkalyq, saýda jáne ınvestısııalyq seriktesteriniń biri ekenin atap ótti. QR táýelsizdik alǵan jyldary AQSh-tan Qazaqstanǵa tikeleı ınvestısııalar aǵyny $53 mlrd-tan nemese tartylǵan sheteldik kapıtaldyń jalpy kóleminiń 15%-ynan asty.
Amerıkanyń jetekshi kompanııalarynyń kóp bóligi QR ekonomıkasynyń mashına jasaý, hımııa, qurylys, IT jáne agroónerkásip, taý-ken metallýrgııasy jáne munaı-gaz sektorlarynda jumys isteıdi.
Premer-Mınıstr Qazaqstan ekonomıkasynyń qalpyna keltirý baǵytyna shyǵýyna oraı álem naryqtaryndaǵy qazirgi daǵdarys aıasynda Úkimettiń QR-ǵa amerıkalyq óndiristerdi tartý boıynsha jumystardy kúsheıtýge nıetti ekenin jetkizdi.
Úkimet basshysy naqty sektordyń turaqtylyǵynyń joǵary deńgeıi aıasynda Qazaqstan ekonomıkasynyń birshata básekege qabilettiliginiń artqanyn atap ótti.
Ulttyq ekonomıkanyń turaqtylyǵyn jetekshi halyqaralyq nesıe agenttikteri baǵalady. Moody’s, Fitch jáne S&P memlekettik qaryzdyń tómendigin, fıskaldy júıeniń turaqtylyǵyn, Úkimet qabyldap jatqan daǵdarysqa qarsy sharalardyń tıimdiligin atap ótti.
Premer-Mınıstr Qazaqstannyń 2025 jylǵa deıingi Strategııalyq damý jospary, sheteldik kapıtaldy tartýǵa targettelgen tásil jáne ınvestısııalyq ahýaldy odan ári jetildirý jónindegi sharalar týraly aıtty
"Investısııalar tartý bizdiń jańa ekonomıkalyq modelimiz úshin asa mańyzdy. Jańa sharalar QR ınvestısııalyq ahýalyna álemniń asa básekege qabiletti ekonomıkalaryna saı kelýge múmkindik beredi", - dedi A.Mamın.
О́z kezeginde rásimde sóz sóılegen AQSh saýda mınıstri Ý. Ross, AQSh Saýda palatasynyń prezıdenti T. Donahıý jáne Chevron kompanııasynyń bas atqarýshy dırektory M. Vırt Qazaqstan-Amerıka Iskerlik keńesiniń qurylýymen elder arasyndaǵy ınvestısııalyq yntymaqtastyqtyń sapaly jańa deńgeıge shyǵatynyn atap ótti. Bul rette, amerıkalyq bıznes úshin qazaqstandyq ekonomıkanyń turaqtylyǵy men tartymdylyǵy atap ótildi.
Telekópir rejımindegi is-sharaǵa jetekshi amerıkalyq kompanııalardyń – Chevron, GE, Shell, J.P.Morgan Chase, Princeton Healthcare Alliance, Pfizer, Tyson Foods, IBM, Oracle, Facebook, Google, DuPont Pioneer jáne basqa da kásiporyndardyń 100-den astam ókilderi, AQSh Memlekettik departamentiniń, QR Úkimetiniń músheleri, «Samuryq-Qazyna» UÁQ» AQ, QR ulttyq kompanııalary men damý qorlarynyń basshylary, QR-nyń AQSh-taǵy elshileri E. Qazyhanov jáne AQSh-tyń QR-daǵy elshisi Ý. Mozer qatysty.
AQSh Saýda palatasy janyndaǵy Qazaqstan-Amerıka Iskerlik keńesi (USKZBC) Qazaqstanda kommersııalyq qyzmet júrgizetin amerıkalyq kompanııalardy biriktiredi. Iskerlik keńestiń tóraǵasy bolyp Chevron kompanııasynyń bas atqarýshy dırektory M. Vırt saılandy.