Qyzylordada tergeý ızolıatorynda qamaýda otyrǵan adamǵa ákelingen tamaq ishinen ruqsat etilmegen zattar tabyldy. Bul týraly Qyzylorda oblysy boıynsha Qylmystyq atqarý júıesi departamentiniń baspasóz hatshysy Dana Dostanova málim etti, dep habarlaıdy Egemen.kz.
"Qyzylorda qalasynyń turǵyny qamaýda otyrǵan adamǵa palaý ishine uıaly telefon, uıaly baılanys sımkartalary men 2 dana qýattaǵysh qurylǵysyn salyp ótkizbek bolǵan. Ol ony folga kaǵazyna orap, tamaq ishine jasyrǵan", - delingen habarlamada.
Onyń aıtýynsha, qazir atalǵan derek boıynsha QR Ákimshilik quqyq buzýshylyq týraly kodeksiniń 481-babyna sáıkes is-qujattary daıyndalǵan. Ol prosessýaldyq sheshim qabyldaý úshin Qyzylorda qalalyq ákimshilik sotyna joldanǵan.