Nur-Sultan qalasynda onlaın rejımde "Atameken" QR Ulttyq kásipkerler palatasynyń VII sezi ótti, dep habarlaıdy Egemen.kz.
"Sońǵy bes jyl ishinde shaǵyn jáne orta bıznestiń el ekonomıkasyndaǵy úlesi 24 paıyzdan 32 paıyzǵa artty. Kásipkerlik salasynda eńbek etetin azamattardyń sany 21 paıyzǵa, ıaǵnı 2,8 mıllıonnan 3,4 mıllıonǵa deıin ósti. Qazir jumyspen qamtylǵandardyń 40 paıyzǵa jýyǵy shaǵyn jáne orta bızneste eńbek etedi. Buǵan memleket pen bıznesti baılanystyryp otyrǵan Ulttyq palatanyń sińirgen eńbegi mol. Meniń tapsyrmam boıynsha kásipkerlerdiń quqyqtaryn qorǵaý úshin "bızneske adaldyq prezýmpsııasy" qaǵıdaty zań júzinde bekitildi. Bul barsha daýly jáne túsiniksiz máselelerdi kásipkerlerdiń paıdasyna sheshýge múmkindik beredi. Atalǵan zań shyǵarýdaǵy ózgerister tıisti sot tájirıbesinde qoldaý tabatynyna senemin. Osy jyldyń 1 qańtarynan bastap meniń Jarlyǵyma sáıkes shaǵyn jáne orta bıznesti úsh jylǵa deıin tekserýden bosatý týraly moratorıı kúshine endi. Nátıjesinde mundaı sýbektilerdi tekserý kólemi 8 ese qysqardy", degen Qazaqstan Prezıdenti Qasym-Jomart Toqaev Úkimet pen "Atameken" UKP-nyń úılesimdi jumysy elimizdegi bıznes ahýalǵa oń áser etip otyrǵanyn da atap ótti.
"Atameken" QR UKP Tóralqa Tóraǵasy Tımýr Qulybaev pandemııa kezeńinde otandyq kásipkerler tap bolǵan negizgi problemalardy atady.
"2020 jyl pandemııa áser etýimen ótti. Biz júrgizgen saýalnamalardyń derekteri boıynsha pandemııa eldegi 1 mln kásipkerge áserin tıgizgen. Kólik, saýda salalary anaǵurlym zardap shekken, ondaǵy aınalymnyń qysqarýy 10-17 paıyzdy quraǵan. Shamamen 1,6 mln qyzmetker aqysyz demalysqa jiberilgen. Memleket basshysy tarapynan qoldaý tapqan qoldaý sharalarynyń keshendi paketi indet saldaryn birshama jumsartýǵa múmkindik berdi. Nátıjesinde 15 myńnan astam kásipker nesıe tólemderi boıynsha shegerim aldy. Qoldaý sharalarynyń paketi Úkimettiń oryn alǵan sıtýasııaǵa jedel áreket etýi boldy. "Atameken" memleket organdarymen birlesip, n tótenshe jaǵdaı rejım jarııalanǵannan bastap búgingi kúnge deıin kún saıy jaǵdaıǵa monıtorıng júrgizip otyrdy", dedi "Atameken" UKP Tóralqa Tóraǵasy Tımýr Qulybaev.
Eske salsaq, "Atameken" kúrdeli ahýaldyń alǵashqy kúninen bastap óńirler, salalar men sektorlarda naqty sıtýasııany anyqtaý maqsatynda kásipkerler arasynda saýalnamalar júrgizdi. Saýalnamalar barysynda jınalǵan barlyq derekter Úkimetke jiberilip, el kásipkerlerin qoldaý sharalarynyń negizine alyndy.
Daǵdarysqa qarsy sharalardan basqa "Atameken" basshysy búginde Ulttyq palata óz aldyna qoıǵan uzaq merzimdi mindetteri, sonyń ishinde 860 myńnan astam kásipkerlik sýbektisin nemese jumys istep turǵan kásipkerlerdiń jalpy sanynyń 65%-yn qamtyǵanretteý júıesin "taza paraqtan" engizýge qatysatynyn aıtty. Sonymen qatar Ulttyq palatada mindeti jumyspen qamtylýdy tirkeý jáne kóleńkeli ekonomıkany tómendetý bolyp sanalatyn jańa Salyq kodeksin ázirleýge qatysty usynystary bar. Bıznesti nesıeleý jáne óńirlerde kásipkerlerdi qoldaý máselesi jekeleı kóterildi.
"Memleket basshysynyń "Bızneske arnalǵan úkimetti" iske asyrýǵa qatysty tapsyrmasyn oryndaý maqsatynda bıznestiń sıfrlyq ekojúıesin qurý boıynsha jumysty jalǵastyrýdamyz, onda kásipkerler onlaın-formatta qyzmetter keshenin qoldanyp,ótinimder jiberip, keri baılanys ala alady", dep atap ótti Tımýr Qulybaev.
Kezdesý sońynda QR Úkimeti jáne QR UKP arasynda ózara árekettesý týraly kelisimge qosymsha kelisim jasaldy.