Qorǵanys mınıstriniń orynbasary, general-leıtenant Tımýr Dándibaev armııa generaly Saǵadat Nurmaǵambetov atyndaǵy Qurlyq áskerleriniń Áskerı ınstıtýty men Radıoelektronıka jáne baılanys áskerı-ınjenerlik ınstıtýtyna bardy.
Joǵary oqý oryndarynyń bastyqtary, general-maıor Dýlat Adyrbekov pen general-maıor Asqar Mustabekov mınıstrdiń orynbasaryna oqý oryndaryndaǵy jumystardyń qazirgi jaǵdaıy týraly baıandap berdi. Sonymen qatar professor-oqytýshylar quramymen kezdesý ótti.
Jumys sapary barysynda Tımýr Dándibaev sanıtarlyq-epıdemııalyq shekteýler jaǵdaıyndaǵy oqý júıesin, oqý-materıaldyq bazanyń jaı-kúıin, oqý baǵdarlamalarynyń júzege asyrylýyn tekserdi. Mınıstrdiń orynbasary oqý tehnıkasy men qarý-jaraq úlgilerin, oqý-ádistemelik bólmelerdiń, kafedralardyń, zerthanalardyń, kitaphanalardyń jabdyqtary men jattyǵý keshenderin qarady.
Kezdesýdiń qorytyndysy boıynsha oqý júıesiniń mazmunyn odan ári jetildirý, áskerı kadrlardy daıarlaý sapasyn arttyrý jóninde nusqaý berildi.