Bilim jáne ǵylym mınıstrligi "Meniń Atamekenim" qoǵamdyq birlestigimen birlese otyryp, mektepterde sabaqtyń onlaın rejıminde ótýine baılanysty oqýshylardy qajetti tehnıkamen qamtamasyz etýge baǵyttalǵan "Oqýshyny qolda" qaıyrymdylyq aksııasyn bastaǵan bolatyn. Osy aksııaǵa "AIDYN NURY Qaıyrymdylyq qory" qoldaý bildirip, jetpis shaqty planshet alyp berdi. Al óńirlerdegi "Atameken" kásipkerler palatasynyń ókilderi ony jetkizip berýge úles qosyp jatyr.
Búgin osy planshetterdiń altaýy qyzylordalyq oqýshylarǵa tabys etildi. Erekshe toqtalyp ótetin jaıt, Kásipkerler palatasy ózdiginen planshet nemese noýtbýk qajet otbasylardyń tizimin jasaqtamaıdy. Tizimde bar-joǵyn bilgisi keletin otbasylar www.qoldau.edu.kz saıtynan balalarynyń JSN nómiriniń sońǵy 6 sanyn terip teksere alady. Al balalardy tizimge qosý jumystaryn mektepterdiń áleýmettik pedagogtary aýdandyq nemese qalalyq bilim bólimi arqyly júzege asyrady.
Basty maqsat – mektep biliminiń onlaın rejımge ótýine baılanysty Qazaqstandaǵy múmkindigi shekteýli, jetim, ata-anasynyń qamqorlyǵynsyz qalǵan balalardy, sondaı-aq az qamtylǵan otbasylardan shyqqan balalardy qajetti tehnıkamen, atap aıtar bolsaq, bastaýysh synyp oqýshylaryn planshetpen, joǵarǵy synyp oqýshylaryn noýtbýkpen qamtamasyz etý.