Qurlyqtyq hokkeı lıgasynda (QHL) óner kórsetetin elordanyń «Barys» hokkeı klýby jańa qorǵaýshymen tolyqty. Bul týraly komandanyń baspasóz qyzmeti habarlady.
25 jastaǵy kanadalyq qorǵaýshy Dıllon Heterıngton elordalyq komandaǵa Amerıkalyq hokkeı lıgasynda (AHL) baq synaıtyn «Tehas Starz» klýbynan aýysyp keldi. О́tken maýsymda ol «Tehas Starz» komandasymen lıganyń 59 matchyna qatysyp, 14 (2+12) upaı jınaǵan. Kalgarı qalasynyń týmasy Heterıngton AHL-da jalpy sany 313 kezdesý ótkizip, qarsylastar qaqpasyn 13 márte dál kózdese,76 ret áriptesterine nátıjeli pas asyrǵan.
Sondaı-aq ol «Dallas Starzben» birge Ulttyq hokkeı lıgasynda (UHL) 11 oıyn ótkizip, eki márte dál pas bergen. О́z kezeginde Dıllon Heterıngton Kanadanyń jasóspirimder jáne jastar quramasymen birge shaıbaly hokkeıden álem chempıony atanǵan. Sonymen qatar «Leık Erı Monsterz» komandasymen AHL-da top jarǵan.