Batys Qazaqstan oblysynyń Qaztalov aýdanyndaǵy mektepterinde oqýshylardyń qashyqtan oqýyna kómek úshin 200 planshet, 150 kompıýter berilgen bolatyn. Buǵan qosymsha jaqynda taǵy 1 100 noýtbýk jetkiziletin boldy. Bul – elimizdiń Bilim jáne ǵylym mınıstrliginiń qoldaýymen aýyl oqýshylaryna kórsetilip otyrǵan júıeli kómektiń nátıjesi.
Qaztalov aýdany ákimi Albert Esálıevtiń aıtýynsha, búginde aýdan aýmaǵyndaǵy 38 mektepte 5 306 oqýshy bilim alady. Bıyldyń ózinde ǵana aýdanǵa 46 jas muǵalim kelgen. «Karantın shekteýlerine sáıkes, 4 mektepte oqý qashyqtan júrgizilýde. 34 mektep oqytýdyń dástúrli formatyna kóshti. Aýdan mektepteriniń bilim deńgeıi jaman emes. Byltyrǵy oqý jylynda mektep bitirgen 293 túlektiń 102-si joǵary oqý oryndarynyń grantyna ıe boldy. 28 oqýshy «Altyn belgi» ıegeri atandy», deıdi A. Esálıev.
Aıta keteıik, aýdanda ǵımaraty apat jaǵdaıynda dep tanylǵan Alma Orazbaeva atyndaǵy mektep ǵımaraty jańadan salynyp jatyr. Buıyrsa, keler jyly paıdalanýǵa berilmek. Al Bolashaq aýylyndaǵy Ahmet Baıtursynuly atyndaǵy mektep ǵımaratyna kúrdeli jóndeý jasaý úshin 396 mln 874 myń teńge berilip, ıgerildi.