О́kinishke qaraı, indettiń ekinshi tolqyny irgede tur. Qazir barlyq aımaqta saqtyq sharasy kúsheıip, karantın shekteýleri qatańdatyla bastady. Osy sanatta Almaty oblysy da bar. Ázirge óńirdegi jaǵdaı turaqty bolǵanymen, kórshiles Shyǵys Qazaqstan oblysyndaǵy ahýaldyń asqynýy jetisýlyqtardy da alańdatyp otyr, - dep habarlaıdy Egemen.kz.
«Saqtyq ta qorlyq joq» degendeı, qazir eki aımaqtyń shekarasyna sanıtarlyq beketter qoıylyp, kirgen, shyqqan kólikter qatań tekserýden ótýde. Jolaýshylardyń densaýlyǵy tekeserilip, adamdar týraly anyqtama toltyrylyp jatyr. Bul shara vırýstyń el ishinde keńinen taralýynyń aldyn almaq. Al Almaty oblysy boıynsha pandemııa maýsymy bastalǵaly beri 5204 adam koronavırýs indetiń juqtyrǵan eken. Dertten 52 adam qaıtys bolǵan. Mamandardyń deregi boıynsha, aımaqtaǵy vırýs juqtyrý qarqyny táýligine 0.2 paıyz shamasynda anyqtalǵan. Qazirgi sátte 149 adam stasıonarlarda em qabyldap jatyr
- Indetpen kúres jumysynda irkilis joq. Biz óz tarapymyzdan kúresý sharasyna tolyq daıyndyq jasap otyrmyz. Buǵan tıisti qarjy bólinip, qajetti qural-jabdyq, dári-dármek qory jasaldy. Mamandar qatary da tolyqtyryldy.Koronavırýs ınfeksııasymen kúresý maqsatynda Taldyqorǵan qalasynda 200 tósek oryndyq modýldik ınfeksııalyq aýrýhana paıdalanýǵa berildi. Jalpy 5280 tósek-oryn daıyndaldy. Dáriger kadrlarmen qamtamasyz etý maqsatynda Qazaqstan-Reseı medısınalyq ýnıversıtetimen densaýlyq saqtaý mamandaryn, ınternderdi, rezıdentterdi kóp deńgeıli daıarlaý boıynsha oqý ortalyǵyn qurý týraly memorandým jasaldy. Taldyqorǵan jáne Almaty qalalaryndaǵy kópsalaly aýrýhanalardyń bazasynda aýyr naýqastarǵa shuǵyl kómek kórsetý úshin zamanaýı qurylǵylarmen jabdyqtalǵan ortalyqtar quryldy. Sondaı–aq, balalar juqpaly aýrýlar aýrýhanalarynyń bazasynda balalarǵa arnalǵan eki COVID-ortalyǵy qosymsha jaraqtandyrylýda. Jalpy pandemııamen kúreske jergilikti bıýdjetten 13,8 mlrd.teńge, onyń ishinde koronavırýstyń ekinshi tolqynyna daıyndyqqa 8,9 mlrd teńge bólindi., - deıdi oblystyq densaýlyq saqtaý basqarmasynyń basshysy О́mirzaq Nızıabekov.
Jalpy, ekinshi tolqynǵa daıyndyq barysyn pysyqtaý aıasynda oblystaǵy SOVID ortalyǵyna 1 sıfrlyq rentgen-apparat, 2ókpeni jasandy jeldetý apparaty, 12 konsentrator, 30 monıtor, 8 vıbroakýstıkalyq apparat, 130 pýlsoksımetr sııaqty medısınalyq jabdyqtar jetkizilgen. Al aýrýhanalarda 534 ókpeni jasandy jeldetý apparaty bar. Taýıada respýblıkalyq bıýdjet esebinen taǵy 130 qurylǵy jetkizilmek. Jergilikti bıýdjetten 1,2 mlrd teńge somasyna 100 birlik ókpeni jasandy jeldetý apparattary satyp alyndy. Sondaı-aq, oblystyń 13 aýrýhanasy ottegi stansııalarymen qamtamasyz etilip otyr. Onyń ishinde 12 ottegi stansııasy iske qosyldy. Aýdandardaǵy aýrýhanalar úshin 1070 dana ottegi konsentratory satyp alynǵan. Iаǵnı, óńir boıynsha daıyndalǵan 5280 tósek-orynnyń 40 paıyzy ottegimen qamtamasyz etiletin bolady.
- Árıne, indetpen kúreste medısına qyzmetkerleriniń bilimi men biligine senim artamyz. Áriptesterimizdiń qaýipsizdigin qamtamasyz etý de basty orynda. Qazir oblystyń medısına mekemelerinde jeke qorǵaný quraldarynyń úsh aılyq qory bar. Al dárilik zattardyń eki aılyq qory jasaqtaldy. Onyń ishinde biryńǵaı dıstrebıýtermen 500 mlnteńgege dárilik zattardyń 30 túrin satyp alýǵa shart jasaldy. Iаǵnı, qazir medısına uıymdary men dárihanalarda dári-dármek tapshylyǵy joq. 15 qyrkúıekten bastap turyǵyndardy tumaýǵa qarsy egý bastaldy, búginge deıin 214 myń adam ekpe saldyrdy. Jalpy, naýqastardy emdeý úshin 3455 medısına qyzmetkeri, onyń ishinde 851 dáriger jumyldyrylady, - deıdi taǵy oblystyq densaýlyq saqtaý basqarmasynyń basshysy О́mirzaq Nızıabekov.
Almaty oblysy