Zardaby áli tolyq joıyla qoımaǵan Ekinshi dúnıejúzilik soǵysta qoldanylǵan qarý-jaraqtar kóp kezdespeıdi. Degenmen ótken kúnniń umytylmas belgisine aınalǵan qarýdyń biri oblystyq tarıhı-ólketaný mýzeıiniń qorynda saqtaýly tur. Bul – áıgili «Maksım» pýlemeti.
Tarıhı derekke súıensek, bul qarýdy brıtandyq ónertapqysh Haırem Stıvens Maksım 1873 jyly oılap tapqan eken. Bastapqy kezdegi salmaǵy – 240 kılo, kalıbri – 11,43 mm. Keıinnen «Berdan» myltyq patronynyń kalıbrine aýystyrylyp, salmaǵy 64 kıloǵa deıin jeńildegen. Osyndaı tarıhy bar pýlemetti mýzeı qoryna 1970 jyly «DOSAAF» Gýrev oblystyq sporttyq atqyshtar klýby tapsyrypty.
– «Maksım» Ekinshi dúnıejúzilik soǵysta keńestik pýlemetshilerdiń basty qarýy boldy. Ony soǵys kezinde, ásirese artıllerııada, tankterde, brondy mashınalarda, avıasııada keńinen qoldandy. Máselen, Keńes Odaǵynyń Batyry atanǵan qazaqtyń qaısar qyzy Mánshúk Mámetova osy pýlemetpen jaýǵa qarsy mınýtyna 600 oq jaýdyrǵan, – deıdi mýzeı qyzmetkerleri.
Atyraý oblysy