Qorǵanys vedomstvosynda ótken apparat keńesinde Qarýly Kúshterdiń jańa oqý jylyna negizgi daıarlyq máseleleri qaralyp, sonymen qatar áskerdiń kúndelikti tynys-tirshiliginiń keıbir baǵyttary boıynsha tapsyrmalar berildi.
Keńeste qorǵanys vedomstvosynyń qarjy tártibin saqtaýy týraly aıtyldy. Bólingen bıýdjet qarajatyn 100 paıyz ıgerýmen qatar, osy jyldyń ótken kezeńinde 9 mıllıardtan astam teńge únemdeldi. Únemdeý memlekettik satyp alýdy júrgizý kezinde úlken aıqyndylyq pen ashyqtyqty qamtamasyz etý, sonymen qatar zańnamany buljytpaı oryndaý men konkýrstyq prosedýralardy jetildirý esebinen qol jetkizilgen bolatyn. Únemdeý esebinen alynǵan qarajat Qarýly Kúshterdi damytýdyń basym baǵyttaryna bólindi.
Qorǵanys mınıstrliginiń áskerı oqý oryndaryn tekserý komıssııalarynyń qorytyndylary boıynsha, Qarýly Kúshter túrleriniń bas qolbasshylaryna Áskerı ǵylym jáne bilim departamentimen ózara birlese otyryp bilim úderisin jetildirý boıynsha sharalar qabyldaý jóninde nusqaýlar berildi. Bul birinshi kezekte professorlyq-oqytýshy quramdy jasaqtaýǵa jáne olardyń biliktiligin arttyrýǵa, oqý úderisi kezinde jańa oqý-jattyǵý trenajerlerin, qarý-jaraq pen áskerı tehnıka úlgilerin qoldanýǵa, kýrsanttardyń oqý materıaldaryn sapaly meńgerýge yntalandyrý úshin qosymsha sharalar jasaýǵa qatysty. Bolashaq ofıserlerdi daıarlaýdaǵy úlgili áleýmettik-turmystyq jaǵdaılar jasaý – mańyzdy másele.
Kelesi jyly barlyq kazarmalyq-turǵyn úı qoryn tekserýdi júrgizý týraly máseleni qaraý tapsyryldy. Qarýly Kúshterdegi nysandar keńes kezeńinen beri kúrdeli jóndeýden ótpegen, sondyqtan jyldan jylǵa tozyǵy jetip, eskirgen. Osyǵan baılanysty olardyń shynaıy jaǵdaıyn qarap, budan ári paıdalaný ahýalyn baǵalaý qajettiligi týyndap otyr.
Qorǵanys mınıstri, general-leıtenant Nurlan Ermekbaev jalpy Qarýly Kúshterde memlekettik tildiń qoldanylý aıasy keńeıip kele jatqanyn atap ótti. Keńester, is júrgizý jáne normatıvtik quqyqtyq aktilerdi ázirleý memlekettik tilde júrgiziledi, al áskerı qyzmetshiler arasyndaǵy qarym-qatynas, áskerı bólimshelerdi basqarý eki tilde júzege asyrylady.
Bul rette jekelegen laýazymdy tulǵalardyń, onyń ishinde basshylyqtyń memlekettik tildi meńgerýin jaqsartý kerek ekenine basa nazar aýdaryldy. Negizinen, olar óz isiniń sheberleri, bilimdi jáne jan-jaqty mamandar, alaıda memlekettik tilde óz oılaryn erkin jetkize almaıdy. Komandalyq quram, komandırler, bas qolbasshylar úshin, tipti mınıstrdiń orynbasarlaryna deıin tereńdetilgen júıeli toptyq sabaqtar men jeke kýrstar, memlekettik tildi bilýin tekserýdi uıymdastyrý boıynsha nusqaý berildi. Ol úshin bilim alýshylarǵa memlekettik tilde sóıleýdi tájirıbe júzinde qoldanýǵa barynsha baǵyttaıtyn oqytýshylardy irikteýge erekshe kóńil bólinedi.
Áskerılerdiń kásibı deńgeıin arttyrýǵa qajetti oqý, ǵylymı-tanymdyq jáne anyqtamalyq oqýlyqtar kóbinese orys nemese aǵylshyn tilderinde shyǵarylady. Sondyqtan Elbasy 2007 jylda belgilegendeı, árbir áskerı qyzmetshi úsh tildi erkin meńgerýge baǵyt alýǵa tıis. «Qazirgi tańda maman, komandır nemese ofıser úshin bir ǵana tildi meńgerý jetkiliksiz», dep atap ótti mınıstr.