Jýyrda S.Báıishev atyndaǵy oblystyq ámbebap ǵylymı kitaphanasynyń májilis zalynda Aqjaıyqtyń «Aq shaǵalasy» atanǵan aqyn, Memlekettik syılyqtyń laýreaty Aqushtap Baqtygereevanyń jáne «Daryn» memlekettik Jastar syılyǵynyń laýreaty, jas aqyn Oljas Qasymovtyń qatysýymen «Qalamgerler álemi» atty ádebı kesh ótti.
Keshti aqyn, kitaphana qyzmetkeri Talǵat Tileýlesov júrgizdi. Sharaǵa Mádenıet qaıratkeri Erkin Qurmanbek, aqyn Nurlybek Qalaýov, Aqtóbe oblysynyń mádenıet, arhıvter jáne qujattama basqarmasynyń basshysy Altynaı Iýnısova jáne kitaphana qyzmetkerleri, poezııany súıetin, ásemdikke jany qumar jastar qatysty.
Aqyn Aqushtap Baqtygereeva ómir mektebinde kezdesetin ózekti máselelerdi qozǵap, óleńsúıer qaýymdy bir serpiltip tastady. Ásirese búgingi analardyń ult bolashaǵy bolyp sanalatyn qyz tárbıesine erekshe den qoıyp qaraýyn aıta otyryp, alańdaýshylyq bildirdi. Aqynnyń aıtýy boıynsha qyz balasy ózine tán náziktikti, bııazylyqty, tazalyqty eshqashan laılamaýy kerek. Sonaý zamannan kele jatqan tektilik pen qaısarlyqty boıyna jınaǵan qazaq qyzdarynyń izin jalǵaıtyn, ultymyzdyń qanyn saqtap qalatyn naǵyz «qazaq qyzy» degen atqa laıyq bolý kerektigin jetkizdi. Aqushtap Baqtygereeva óziniń aıaýly anasyna degen saǵynyshyn óleń joldarymen jetkize otyryp, asyl analardy qasterleı bilýge, júrekterine syzat túsirmeýge shaqyrdy. Aqyn adam ómirine azyq bolarlyq dúnıelerdi aıta otyryp, óz shyǵarmashylyǵynan syrǵa toly óleńderin oqydy.
Jas aqyn Oljas Qasymov Aqtóbe jerine alǵash ret kelgeninde dál osyndaı ádemi, áserli keshte jolyqqanyna rızashylyǵyn bildire otyryp, kórermenderge óleń joldaryn tartý etti. Ádebı keshke jınalǵan óleńdi saǵynǵan kórermender úshin bul rýhanı demalys boldy. Kıeli ordamyzda osyndaı sharalardyń sany arta tússin demekpiz!
Maral JALǴASQYZY,
S.Báıishev atyndaǵy Aqtóbe oblystyq ámbebap ǵylymı kitaphanasynyń qyzmetkeri