Búgin oblys ákimi Gúlshara Ábdiqalyqovanyń qatysýymen ortalyq alańda aımaqtaǵy birqatar medısınalyq mekemelerge sanıtarlyq jedel járdem kólikterin tabystaý rásimi ótti, - dep habarlaıdy Egemen.kz
Qyryq reanımobıl kilti oblystyq medısınalyq jedel járdem stansasyna, Aral, Qazaly, Qarmaqshy, Syrdarııa, Shıeli, Jańaqorǵan aýdandary men Tóretam jedel járdem bólimderine tabystaldy. Qarmaqshy jáne Jalaǵash aýdandaryna 2 jyljymaly medısınalyq keshen berilse, «Araltuz» aksıonerlik qoǵamy demeýshiligimen Aral aýdanaralyq aýrýhanasyna 2 reanımobıl avtokóligi tabystaldy.
"Pandemııa kezinde óńirdegi medısınalyq jedel járdem stansasynyń jumysty saýatty jáne utymdy uıymdastyrýynyń nátıjesinde barlyq respýblıkalyq ındıkatorlardyń oryndalýyn qamtamasyz etti. Halyq densaýlyǵy – elimizdiń belsendi damýyna, ekonomıkasyna, ásirese, áleýmettik jaǵdaıyna yqpal etetini sózsiz. Sondyqtan, qazaqstandyqtardyń densaýlyǵyn jaqsartý – elimizdiń memlekettik saıasatynyń basym baǵyttarynyń biri. Osy rette, aldaǵy 5 jyl ishinde bilim, ǵylym, densaýlyq saqtaý salalaryna jumsalatyn qarajatty ishki jalpy ónimniń 10 paıyzyna jetkizý josparlanǵan. Bul óz kezeginde halyqtyńómir súrý sapasyn jaqsartýǵa ákeledi", - dedi oblys ákimi.
Búginde oblys halqyna 2423 dáriger, 9528 orta býyn maman medısınalyq qyzmet kórsetedi. 2016 jyldan bastap óńirge qajetti medısına mamandyqtary boıynsha 91 rezıdentke oblys ákiminiń granty taǵaıyndaldy.
Odan bólek, 2018 jyldan bastap Marat Ospanov atyndaǵy Batys Qazaqstan medısına ýnıversıtetimen jasalǵan memorandým aıasynda oblys ákiminiń arnaıy granty bólinip, qazir 100 jalpy tájirıbelik dáriger jergilikti bıýdjet qarajaty esebinen daıarlanýda.
Qazirgi tańda jedel járdem qyzmetin ortalyqtandyrýdyń arqasynda oblys ortalyǵy men aýdandarda jedel járdem qyzmeti bir deńgeıde kórsetilip otyr.
Sapaly kórsetkishterge toqtala ketsek, 2020 jyly shaqyrystarǵa keshigý kórsetkishi 2,5 %-dan 1,9%-ǵa azaısa, jedel járdem tobynyń kóz aldyndaǵy ólim kórsetkishi 3,2%-dan 1,6%-ǵa tómendep, nátıjeli reanımasııa 47,2%-dan 56,3 %-ǵa ulǵaıdy.
Shara sońynda sala ardageri Turǵanbaı Mahanov memleket tarapynan medısına salasyna kórsetilgen qoldaýǵa alǵysyn jetkizip, aldaǵy jumystarǵa sáttilik tiledi.