QR Parlamenti Májilisi sársenbidegi plenarlyq otyrysta jańa Ekologııalyq kodeks jobasyn ekinshi oqylymda maquldady. Joba Senattyń qaraýyna jiberildi.
Ekinshi oqylymda Májilis depýtattary redaksııalyq jáne naqtylaý mánindegi birqatar ózgerister engizgen. Sonymen birge, eń úzdik qoljetimdi tehnologııalardy engizý boıynsha ulttyq anyqtamalardy jasaý erejeleriniń normalary kúsheıtildi. Endi mundaı anyqtamalar ulttyq standart túrinde emes, Úkimet deńgeıinde bekitiledi.
Osyǵan qosa, ekologııalyq tıimdilikti arttyrý baǵdarlamasynda tek is-sharalar kúntizbesi emes, emıssııalardy kezeń-kezeńimen tómendetý kúntizbesi men baǵdarlamanyń oryndalýyn mınıstrlik tarapynan jyl saıynǵy tekserý normalary bolýy tıis. Deı turǵanmen, is-sharalardyń keı kezeńderin 1 jylǵa deıingi merzimge keıinge qaldyrýǵa múmkindik bar.
Ekologııalyq tıimdilikti arttyrý baǵdarlamasynyń operatory ereje buzsa jáne ony qalpyna keltirmese, ruqsaty avtomatty túrde toqtatylady. Ekologııalyq tıimdilikti arttyrý baǵdarlamasyn qaıta qaraý prosedýrasy ashyq bolý úshin mindetti qoǵamdyq tyńdaý qarastyrylǵan.
Taý-ken jáne metallýrgııalyq kásiporyndar jumysynyń toqtap qalý táýekelin boldyrmas úshin osyndaı kásiporyndardyń buryn salynyp qoıǵan qaldyqtardy ornalastyrý nysandaryna Kodekstiń keı normalaryn 2036 jylǵa deıin qoldanysqa engizýge ruqsat beriledi. Degenmen mundaı nysandardy keńeıtýge tek qorshaǵan ortaǵa áserdi baǵalaý, ekologııalyq ruqsattama jáne turaqty monıtorıng operatorynyń qorshaǵan orta komponentterine áserdi baǵalaý prosesterinen ótkennen keıin ǵana múmkindik týady.
Emıssııalardyń avtomattandyrylǵan monıtorıng júıesin engizý 2023 jylǵa deıin keıinge qaldyrylyp otyr.
Aldynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev Ekologııalyq kodeks jobasynda lastaýdyń aldyn alyp, baqylaý júrgizýge baǵyttalǵan «lastaýshy tóleıdi» prınsıpi bar ekenin aıtqan.
«Ekologııaǵa zııan kelgen jaǵdaıda tabıǵat paıdalanýshy qorshaǵan ortany bastapqy qalpyna qalta keltirýge mindetti», - degen ol.
Ekologııalyq kodekstiń mańyzdy normalarynyń biri – iri kásiporyndardyń eń ozyq qoljetimdi tehnologııalardy engizýge mindettelýi.
Sonymen qatar zań jobasynda jergilikti atqarýshy organdar ekologııalyq tólemderdi 100% kóleminde tabıǵatty qorǵaý is-sharalaryna jumsaıtyny jazylǵan.Májilis ekinshi oqylymda Kodekspen qatar, birneshe ilespe zańdardy da maquldady. Ilespe zań jobasy halyqtyń densaýlyǵy men ómirine qaýip tóndiretin áreketterdi joıý úshin aldyn ala eskertýsiz tekserýge shyǵýǵa múmkindik beretin ózgeristerdi, qaýipti qaldyqtardy qaıta óńdeý, ýtılızasııalaý jáne kózin joıý qyzmetiniń lısenzııalaý erejesin engizýdi kózdeıdi. Qaldyqtardy tasymaldaý boıynsha eskertý tártibi engiziledi.
Eń úzdik qoljetimdi tehnologııalardy engizýge keshendi ekologııalyq ruqsat alǵan jańa nysandardy emıssııa tólemderinen bosatý normalary da qarastyrylǵan. Osyǵan uqsas mehanızm jumys istep turǵan kásiporyndar úshin de kózdelip otyr. Olar emıssııa tólemderinen bosaý úshin ekologııalyq tıimdilik baǵdarlamasyn júzege asyryp, eń úzdik qoljetimdi tehnologııalardy engizýleri tıis.