Senat Tóraǵasynyń orynbasary Asqar Shákirov pen senator Nurtóre Júsip Premer-Mınıstrdiń atyna depýtattyq saýal joldady. Olardyń aıtýynsha, azamattardyń óz quqyqtaryn qorǵaý máselelerin tolyq bilmeýi quqyqtyq tetikterdi qoldanýǵa múmkindik bermeıdi. Bul týraly Senattyń baspasóz qyzmeti habarlady.
«Jyl saıyn balalarǵa qatysty qylmys sany kóbeıip otyr. Bas prokýratýranyń málimetine súıensek, bıyl elimizde mundaı jaǵdaı 8 paıyzǵa ósken. Oǵan kámeletke tolmaǵandarǵa qatysty seksýaldyq sıpattaǵy faktilerdi jasyrǵany úshin qylmystyq jaýapkershiliktiń engizilýi de sebep boldy. Jalpy, 70 paıyzdan astam jaǵdaıda kámeletke tolmaǵandarǵa qatysty qylmystardy jaqyn, týys adamdar jasaıtyny alańdatady», – deıdi senatorlar.
Soǵan sáıkes olar adam quqyqtarynyń negizderin jalpy bilim beretin mektep baǵdarlamasyna mindetti pán retinde engizýdi usyndy.
«Qazir joǵary synyptarda «Adam. Qoǵam. Quqyq» páni oqytylady. Onyń mazmuny adam quqyqtary men bostandyqtarynyń máni, olardy qorǵaý tásilderine emes, adam tabıǵaty týraly jalpy paıymdaýlar tóńireginde ǵana júredi. Qoǵamdaǵy ahýaldy eskerip, atalǵan pándi bastaýysh synyptardan bastap oqytqan jón dep esepteımiz», – dedi Nurtóre Júsip.
Saýal joldaǵan depýtattardyń sózine súıensek, zań aıasynda jaýapkershilik qarastyrylsa da óńirlik BAQ-ta zorlyq-zombylyqqa ushyraǵan nemese keleńsiz áreket jasaǵan balalardyń sýretteri men olar týraly derekterdi jarııalaý máselesi kezdesip jatady. Jeke ómirge qol suǵýshylyqtyń saldary aýyr bolýy múmkin.
«Kásibı etıkany buzýǵa jol bermeý úshin jýrnalısterdiń Etıkalyq kodeksin jetildirý qajet. Oǵan jurtshylyq ókilderin, múddeli ýákiletti organdardy, sondaı-aq, Parlament depýtattaryn jumyldyrǵan oryndy bolar edi», – dep atap ótti Senat depýtaty.