Osydan eki jyl buryn qaıta qurylǵan Raıymbek aýdanynda turǵyndar memlekettik qyzmetterdi shaǵyn sektordan alýǵa májbúr bolǵan edi. Búgin «Azamattarǵa arnalǵan úkimet» memlekettik korporasııasy men Almaty oblysynyń ákimdigi halyqqa qolaıly jaǵdaı jasaý úshin aýdan ortalyǵy Narynqolda tolyqqandy HQO ashty.
Buǵan deıin Raıymbek aýdanyndaǵy memlekettik qyzmet kórsetý sektorynyń mamandary 395 sharshy metrdi quraıtyn jaldamaly nysanda jumys istegen edi. Endi olar qajetti deńgeıde jabdyqtalǵan, aýmaǵy 1087 sharshy metr záýlim ǵımaratta qyzmet kórsetetin bolady.
«Bul jerde qyzmet alýshylar úshin barlyq jaǵdaı jasalyp, múmkindigi shekteýli jandar úshin pandýstar men shaqyrtý túımeleri qarastyrylǵan. Halyqtyń ıgiligi úshin osyndaı sý jańa ǵımarat salýǵa muryndyq bolǵan Almaty oblysynyń ákimdigine rızashylyǵymyzdy bildiremiz», - dedi «Azamattarǵa arnalǵan úkimettiń» Almaty oblystyq fılıalynyń dırektory Ermek Bekjúnisov.
Ashylý saltanatyna qatysqan Almaty oblysynyń ákimi Amandyq Batalovtyń aıtýynsha, 40 myńnan astam halqy bar aýdan úshin zamanǵa saı jasaqtalǵan Halyqqa qyzmet kórsetý ortalyǵyn ashý qajettiligi burynnan týyndaǵan.
«2018 jyly oblysymyzdaǵy bir aýdan Raıymbek jáne Kegen aýdandary bolyp ekige bólindi. Nátıjesinde aýdan ortalyǵy mártebesine ıe bolǵan Narynqol jańa serpinmen damyp, gúldenip keledi. Sonyń bir kórinisi – halyq ıgiligine arnalǵan osyndaı jańa ortalyqtyń ashylýy», - dedi ol.
Jańa tehnıka jáne jıhazdarmen jabdyqtalǵan ortalyqtyń operasııalyq zalynda 12 maman qyzmet etedi, al daıyn qujattardy berý sektorynda 10 jumys orny bar. Zeınetkerlerge, kópbalaly otbasylarǵa jáne múmkindigi shekteýli jandarǵa arnalǵan jeńildik terezesi de uıymdastyrylǵan.
Sondaı-aq záýlim ǵımaratta memlekettik korporasııanyń front-ofıs mamandary ǵana emes, jyljymaıtyn múliktiń tehnıkalyq sıpattamasy men jer kadastryn, zeınetaqylar men járdemaqylardy esepteıtin bek-ofıs bólimderi de ornalastyrylǵan. Ortalyq aýlasynda qyzmet alýshylarǵa arnalǵan avtoturaq ta bar.