Elbasy Nursultan Nazarbaev Astananyń jańa Halyqaralyq ýnıversıtetinde oqý úshin 500 grant bólýge sheshim qabyldady. Premer-Mınıstr Kárim Másimov ceısenbi kúni ótken Úkimet otyrysynda osylaı dep habarlady.
Jobanyń mańyzdylyǵyn eskere otyryp, Elbasy bıylǵy jyly osy ýnıversıtetke oqýǵa túsetin talantty talapkerlerge 500 grant bólýge sheshim qabyldap otyr, dep atap kórsetti Premer-Mınıstr. Osyǵan oraı Úkimet basshysy Qarjy mınıstrligi men Bilim jáne ǵylym mınıstrligine qajetti resýrsty ýaqytyly bólýdi qamtamasyz etýdi tapsyrsa, Astana qalasy ákimdigi men Qurylys jáne turǵyn-úı kommýnaldyq sharýashylyq isteri agenttigine granttarǵa ıe bolǵan 500 stýdentke arnalǵan jataqhana men oqytýshylar úshin qajetti turǵyn úılerdi 1 qyrkúıekke deıin daıyndaýdy tapsyrdy.
Prezıdent N.Nazarbaevtyń bastamasymen salynyp jatqan Jańa ýnıversıtet bolashaqta ulttyq bilim berý júıesi men álemdik ozyq ǵylymı-bilim berý tájirıbesin biriktirgen jańa kúshpen qarýlana otyryp, zamanaýı ǵylymı, myqty ınfraqurylymmen jáne ǵylymı-ınjenerlik kadrlarmen jumys jasaıtyn bolady.
Astana ýnıversıteti álemniń úzdik 30 joo-symen áriptestik qarym-qatynas ornatatyn bolady.
Qazirgi ýaqytta ýnıversıtettiń bakalavrıatyna – Foundation birinshi kýrs stýdentterin qabyldaý júrýde. Olardy 2010 jyldyń 1 qyrkúıeginde London College University-den kelgen 50 oqytýshy akademııalyq baǵdarlamalarǵa oqytatyn bolady. Atap aıtsaq, ýnıversıtet negizinde bakalavrıat baǵdarlamasymen Injenerlik, jaratylystaný jáne gýmanıtarlyq ǵylymdar mektebi, Medısına mektebi ashylatyn bolady.
Venera TÚGELBAI.