On bir aýylǵa gaz jetti

Bıyl Batys Qazaqstan oblysynda 24 aýylǵa gaz qubyryn tartý josparlanǵan bolatyn. Osynyń nátıjesinde óńir turǵyndarynyń 98,6%-y ot jaǵyp, kúl shyǵarý beınetin umytady. Mine, jaqynda ǵana Aqjaıyq aýdanyndaǵy Alǵabas aýyldyq okrýgine qarasty Jańajol, Tegisjol, Qaraǵaı, Toǵan aýyldaryna jáne Jambyl aýyldyq okrýgindegi Jambyl, Úshtóbe, Bitik eldi mekenderine gaz tartyldy. Shaǵyn ǵana Jańajol aýylyna tartylǵan tabıǵı gaz jelisiniń ashylýyna Batys Qazaqstan oblysynyń ákimi Ǵalı Esqalıev arnaıy keldi.

«Bizdiń jumysymyzdyń basty baǵyttarynyń biri – aýyldyq eldi mekenderdi gazdandyrý. О́zderińiz jaqsy bilesizder, toqsanynshy jyl­darǵa deıin aýyldarda gaz bolmady. Elbasynyń bastamasymen Qarashyǵanaq ken ornyna sheteldik ınvestorlar tartylyp, ınvestısııalardyń arqasynda kóptegen aýyl-aımaq gazben qamtylyp otyr. Sońǵy on-on eki jyldyń ishinde shamamen 200-deı eldi mekenge gaz tartyldy. Osy jumystarǵa 30 mlrd teńgeden astam qarajat bólindi. Bıyldyń ózinde oblys boıynsha 1 mlrd 300 mln teńge qarajat qarastyrylyp, 164 shaqyrym gaz qubyry tartyldy. Oblys boıynsha 21 aýylǵa gaz jetkizilse, sizdiń aýdanda 11 eldi meken kógildir otynnyń ıgi­li­gin kórýge múmkindik aldy. Gaz bar jerde bıznes te órken­deı­di. Kásippen aınalysamyn degen jastarymyz aýylda tu­raq­tap, osy ıgiliktiń jemisin kór­sin dep tileımiz. Búgingi qýa­nysh qutty bolsyn, el-jurt aman bolyp, jaqsylyqtarymyz ese­lene bersin» dedi oblys bas­shysy Jańajol aýylyna turǵyndaryna kógildir otyn­nyń alaýyn tutatyp turyp.