«Jas Ulan» biryńǵaı balalar men jasóspirimder uıymy elordada respýblıka jastarynyń basyn qosty. Baıtaq elimizdiń ulandary el astanasyna TRUE or FALSE dep atalatyn medıasaýattylyq boı̆ynsha ıntellektýaldy saıysqa jınaldy.
III kezeńnen turatyn tartysty dodaǵa elimizdiń barlyq óńirinen 14 pen 29 jas aralyǵyndaǵy 150-den astam jas kelip, bas-aıaǵy 20 komanda qatysty. Shara aıasynda olar kıberqaýipsizdik, medıasaýattylyq, IT, jýrnalıstıka salasyndaǵy jetekshi sarapshylardan dáris tyńdady.
Uıymdastyrýshylardyń aıtýynsha, atalǵan shara arqyly jastar men mektep oqýshylaryna aqparattyq qaýipsizdik, ınternet etıka, aqparatpen jumys isteý jáne saralaý syndy qazirgi qoǵamdaǵy mańyzdy daǵdylardy úıretý kózdeledi. Jarysqa jınalǵan jastar aldymen dáris tyńdap, keıin bilim dodasynda oı jarystyrdy.
Saıystyń I kezeńinde komandalar 5-ke bólinip, medıasaýattylyq boıynsha qoıylǵan 8 suraqtan turatyn 5 raýnd oıyn oınady. II kezeńge 15 komanda joldama alyp, shyndyq jáne jalǵan boıynsha vıktorınalyq foto, vıdeo suraqtarǵa jaýap berdi.
Saıystyń fınaldyq kezeńine qarsylastarynan ozyp shyqqan 5 komanda ótti. Bul kezeńde qatysýshylar qoıylǵan suraqtardyń shyndyq ne jalǵan ekenin dálelder keltirip jazbasha tapsyrdy. Qazylar alqasyna óz boljamdaryn qorǵady.
Saıys nátıjesinde Túrkistan oblysynyń namysyn qorǵap kelgen Amazing Turkistan komandasy úzdik dep tanyldy.