Keshe Taılandta úkimetti qoldaıtyn ereýilshiler men premer-mınıstrdiń otstavkaǵa ketýin talap etip otyrǵan oppozısıonerler arasynda birinshi ret qaqtyǵys oryn aldy. Bul týraly jergilikti quqyq qorǵaý organdarynyń aqparyna silteme jasaǵan ITAR-TASS habarlady.
Oqıǵa ortalyqtaǵy Pathýmthanı provınsııasynda oryn alǵan. 100-ge jýyq oppozısıonerler narazylyq aksııasyn uıymdastyrmaq bolyp, jergilikti merııa ǵımaratyna bettegen edi. Alaıda, olardyń qarsy aldynan úkimetti qoldaıtyn 300 erýilshi shyǵyp, eki jaq arasynda janjal bastalyp ketti. Qaqtyǵys nátıjesinde úsh oppozısıoner jaraqat alǵan. Taılandta aýqymdy narazylyq aksııalary bastalǵaly beri mundaı qaqtyǵys birinshi ret oryn alyp otyr.
Taıland premer-mınıstri Iınglak Chınavat oppozısııany narazylyq aksııalaryn toqtatyp, kelissózder ústeline otyrýǵa shaqyrdy.
Derekter boıynsha, 27 qarasha kúni Taıland úkimetiniń otstavkaǵa ketýin talap etken narazylyq aksııalary eldiń 24 provınsııasynda bolyp ótken. Jergilikti BAQ ókilderi ońtústiktegi Songkhla provınsııasynda gýbernator Grısada Býnrach narazylyq bildirýshilerdiń qataryna ótip ketkenin habarlady. Ol sondaı-aq aksııaǵa óziniń kúzetin de qatystyrǵan kórinedi. Eldiń 14 provınsııasynda oppozısıonerler jergilikti merııa ǵımarattaryn basyp alǵan.
Aıdar О́risbaev.
Derekkóz: Itar-tass.com