Batys Qazaqstan oblysynyń Syrym aýdanynda 77 shaqyrymdyq magıstraldy sý qubyry paıdalanýǵa berildi. Keńashy jerasty sý qorynan Jympıty aýylyna deıin tartylǵan bul jeli bolashaqta 7 eldi meken, 10 myń adamdy taza sýmen qamtamasyz etpek.
Quny 2 mıllıard 157 mıllıon teńgege baǵalanǵan jobanyń qurylysyn «Melıorıator» JShS 10 aıdyń ishinde júzege asyrǵan. 77 shaqyrymdyq sý qubyryna qosa 17 shaqyrymdyq elektr jelisi júrgizilip, bul iske 60 adam tartylypty. Taza sý búginde Jympıty men О́leńti aýyldaryna jetken, bolashaqta Shaǵyrlaı, Bulan, Jambyl, Jyraqudyq, Qosoba aýyldaryna qubyr tartylady. Osylaısha Syrym aýdany turǵyndarynyń teń jarymy aýyz sý tapshylyǵynan qutylmaq.
– Keńashydan tartylǵan 77 shaqyrymdyq magıstraldy sý qubyry Jympıty jáne О́leńti aýyldaryndaǵy jaz aılaryndaǵy sý qysymynyń azaıýy máselesin sheshedi dep oılaımyn. Osy kezge deıin paıdalanǵan Danıll núktesi kúnine 500 tekshe metr sý óndiretin bolsa, halyq tutyný úshin budan eki ese artyq mólsherde sý kerek boldy. Keńashy sý ken orny kúnine 2 myń tekshe metr sý óndirýge qaýqarly. Biraq biz bul sýdy únemdeýge tıispiz. Múmkindik bolsa bógetterdi qalpyna keltirip, jerasty sý qorlaryn taýyp, qudyqtar qazyp, malǵa qajetti sý máselesin óz aldyna bólek sheshýimiz kerek. Aýyz sýdy rásýa qylmaı, maqsatty paıdalanaıyq. Únemdemesek, sý tapshylyǵy máselesine qaıta tap bolamyz, – dedi osy jobanyń ashylýyna arnaıy kelgen oblys ákimi Ǵalı Esqalıev.
О́ńir basshysy osy jobanyń júzege asýyna úles qosqan el Úkimeti men Aýyl sharýashylyǵy mınıstrligine, Sý resýrstary komıtetine, Parlament depýtattaryna alǵys aıtty.
«Qazekologııajobalaý» JShS bas ınjeneri Lıýdmıla Lebedevanyń aıtýynsha, Keńashy jerasty sý qoryna 3 uńǵyma qazylǵan. Onyń ekeýi paıdalanylyp, bireýi qosalqy qor retinde saqtalmaq. Mundaǵy ár uńǵyma saǵatyna 60 tekshe metr sý óndiredi. «Keńashynyń sýynyń quramynda temir kóp. О́ndirilgen sý ekinshi núktedegi sý sorý stansasyna kelip, tolyq tazartýdan ótedi. Aýyz sý sapasy barlyq talaptarǵa saı», deıdi L.Lebedeva.
Batys Qazaqstan oblysy