Áleýmettik qyzmetter portalyn iske qosqan aǵymdaǵy jyldyń basynan beri ol arqyly múgedektigi bar adamdar úshin 25,3 myń ońaltýdyń tehnıkalyq quraly berildi, 430-dan astam adam arnaıy áleýmettik qyzmetterge tapsyrys berdi.
Portal múgedektigi bar adamdarǵa OTQ óndirýshi men jetkizýshini óz betinshe tańdaýǵa múmkindik beredi. Kómektiń kepildik berilgen túrine tapsyrys berý elektrondyq sıfrlyq qoltańba arqyly júzege asyrylady. Tapsyrys berilgen OTQ-ny jetkizý arqyly nemese óz betinshe alyp ketýge bolady.
Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldardy, sondaı-aq kreslo-arbalardy usynýdy qamtıdy.
Qazirgi ýaqytta portalda OTQ-nyń 55 túriniń 24-i qoljetimdi. Olardy jeke tańdaý qajet emes. OTQ-nyń jeke tańdap berýdi qajet etetin qalǵan túrleri 2021 jyly portalǵa aýystyrylatyn bolady.
Qazan aıynda portal arqyly jeke kómekshiler men ymdaý tili mamandarynyń qyzmetterine tapsyrys berý, sondaı-aq sanatorlyq-kýrorttyq emdeý mekemesin tańdaý boıynsha fýnksıol pılottyq rejımde iske qosyldy. Aǵymdaǵy jylǵy 7 jeltoqsandaǵy jaǵdaı boıynsha jeke kómekshiniń qyzmetterine 143, ymdaý tili mamanynyń qyzmetterine 134 jáne sanatorlyq-kýrorttyq emdeýge 157 tapsyrys jasalǵan.
Eske sala keteıik, elektrondyq resýrs múgedektigi bar adamdardy qajetti qyzmettermen jáne jetkizýshiden tikeleı OTQ-men qamtamasyz etý maqsatynda ázirlengen.
Qazirgi ýaqytta portalda 1,2 myńnan astam ónim jetkizýshi tirkelgen, olardyń ishinde 782-si arnaýly áleýmettik qyzmet kórsetedi, al 25-i OTQ usynady. Mınıstrlik jetkizýshilerdiń sanyn arttyrý boıynsha belsendi jumys júrgizýde.
«Áleýmettik qyzmetter portaly» avtomattandyrylǵan aqparattyq júıesin engizý Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar sheńberinde kózdelgen.
1411 nómiri boıynsha koll-ortalyqtan portaldy paıdalaný boıynsha konsýltasııa alýǵa bolady.