Televızııalyq pikirsaıys ótedi

Kún tártibindegi másele boıynsha OSK tóraǵasynyń  orynbasary Konstantın Petrov baıandama jasady. Ol saılaý zańnamasyna sáıkes, saılaý­shy óziniń bolatyn jerin aýystyrǵan kezde bıylǵy 26 jeltoqsannan bastap 2021 jylǵy 9 qańtar saǵat 18-00-ge deıin daýys berý quqyǵyn beretin esepten shyǵarý kýáligin alýǵa quqyly ekenin habarlady. Esepten shyǵarý kýáligin tıisti saılaý komıssııasy ótinish pen jeke kýálikti usyný negizinde beredi. Bul kýálikti kórsetken kezde ýchaskelik saılaý komıssııasy daýys beretin kúni saılaýshyny onyń bolatyn jeri bo­ıynsha saılaý ýchaskesindegi tizimge engizedi. Joǵalǵan kýálikter qalpyna keltirilmeıdi, sondaı-aq kóshirmesi berilmeıdi. Bir mezgilde birneshe saılaý ótkizgen kezde Ortalyq saılaý komıssııasy saılaýdyń árbir túri boıynsha esepten shyǵarý kýáliginiń ártúrli túsin belgileıdi, árbir esepten shyǵarý kýáliginde saılaý naýqanynyń ataýy kórsetiledi.

Komıssııa tóraǵasy Berik Imashev saılaýshylardy belsendilik tanytyp, daýys berý quqyǵyn qoldanýǵa shaqyrdy.

Ortalyq saılaý komıssııasynyń múshesi Anastasııa Shegorsova óz baıan­damasynda saılaý aldyndaǵy jarııa pikirsaıystardy ótkizý máselesine toqtaldy. Májilis depýtattyǵyna kandıdattarynyń tizimin usynǵan saıa­sı partııalar OSK uıymdastyratyn tele pikirsaıystarǵa qatysýǵa quqyly. Saılaý aldyndaǵy pikirsaıystardy ótkizý qaǵıdalary men sharttary Ortalyq saılaý komıssııasynyń 2018 jylǵy 28 tamyzdaǵy qaýlysymen bekitilgen. Qujattyń 4-tarmaǵyna sáıkes OSK pikirsaıystardy ótkizý týraly sheshim qabyldanǵan kezden bastap kúntizbelik bes kún ishinde telearnany anyqtap, partııalardyń pikirsaıys ótkizý kúni, ýaqyty men orny týraly jazbasha habardar etedi. Ortalyq saılaý komıssııasy pikirtalasty 2020 jyldyń 30 jeltoqsanynda ótkizý týraly qaýly qabyldady.

Aqparat jáne qoǵamdyq damý mınıstrligi televızııalyq saılaýaldy pikirsaıysty «Habar» telearnasynda ótkizýdi usynǵan. Telearna óz kezeginde pikirsaıysty ótkizý reglamentin ázirlep, kelisý úshin Ortalyq saılaý komıssııasyna jiberdi. Atap aıtqanda, onda qatysýshylarǵa qoıylatyn jalpy talaptar, sóz sóıleý kezegi, ótkizý tili men uzaqtyǵy kórsetilgen. Reglament jobasy «Saılaý týraly» Konstıtýsııalyq zańnyń talaptaryna, sondaı-aq saılaý aldyndaǵy pikirsaıystardy ótkizý qaǵıdalary men sharttaryna sáıkes keledi. Osyǵan baılanysty, OSK televızııalyq pikirsaıysty «Habar» arnasynda ótkizý týraly qaýly qabyldap, is-sharany ótkizý reglamentin bekitti.

Sondaı-aq saıası partııalar bekitken pikirsaıys qatysýshylarynyń quramy anyqtaldy. Olar: ADAL partııasynan – partııa saıası keńesiniń múshesi Eldar Jumaǵazıev, «Aq jol» Qazaqstannyń demokratııalyq partııasynan – partııa tóraǵasy Azat Perýashev, «Aýyl» halyqtyq-demokratııalyq patrıottyq partııasynan – partııa tóraǵasy Álı Bektaev, Qazaqstan Halyq partııasynan – partııa tóraǵasy Aıqyn Qońyrov jáne Nur Otan partııasynan – partııa Tóraǵasynyń birinshi orynbasary Baýyrjan Baıbek.

Otyrysqa saıası partııalardyń, Aqparat jáne qoǵamdyq damý mınıstr­liginiń, «Habar» agenttiginiń, EQYU/DIAQB Mıssııasynyń ókilderi já­ne aýmaqtyq saılaý komıssııalary qa­tys­ty.