Bizdiń árbir kúnimiz, árbir saǵatymyz táýelsiz bolýy tıis. Egemendi el bolǵanymyzǵa keler jyly 30 jyl tolady. Bul ýaqyt sanamyzdyń, túısigimizdiń tazarýy týraly áńgimege aınalýy shart.
Azattyq, ásirese, jas býyn sanasyna serpilis berýi kerek. Al biz, aǵa býyn jastardy jetelemeı, kerisinshe solardyń jeteginde kele jatyrmyz. О́skeleń urpaq – saýatty. Tek úlkender jastarǵa táýelsizdik týraly keńistikti keńeıte almaı otyr. Biz jastarǵa: «Meniki durys, meniń aıtqanymmen júr», dep únemi qysym jasaımyz. Bul qate. Jastar sanaly saraptap, jaǵdaıdy ózderi ózgertýi kerek. Ol úshin tárbıe, bilim, mádenıet jáne ǵylymdy ilgeriletýimiz qajet. Osy dúnıelerdi kótersek, ár nárse óziniń qanyq boıaýyna enedi.
Búginde Táýelsizdiktiń 30 jyldyq mereıtoıy qarsańynda turmyz. Buǵan qosa ǵulama Ábý Nasyr ál-Farabıdiń 1150, al hakim Abaıdyń 175 jyldyq mereıtoıy qatar keldi. Ábý Nasyr ál-Farabı osydan on ǵasyr buryn ómir súrgen. Al Abaı Qunanbaıuly odan toǵyz ǵasyr keıin qazaq dalasyn meken etti. Osy 900 jyl aralyǵynda tarıhta nebir jaǵdaı oryn aldy. Álemniń ekinshi ustazy on ǵasyr buryn aıtyp ketken dúnıelerdi toǵyz ǵasyrdan keıin uly Abaı qaıtalap otyr. Bul urpaqtar sabaqtastyǵynyń úzilmegendigin kórsetedi. Nege úzilmedi? Birinshiden, musylmandyǵymyz, ekinshiden túrki tili. Osy eki faktor Ábý Nasyr ál-Farabıdiń aıtqandaryn Abaı zamanyna, Abaı bizdiń zamanǵa jetkizdi. Bul rýhanı baılyq qazaq halqynyń kóregendigi men danalyǵynyń arqasynda saqtalyp qaldy. Bunyń barlyǵy – tuǵyrly táýelsizdigimizdiń jemisi.
Ǵarıfolla ESIM,
UǴA akademıgi,
fılosofııa ǵylymdarynyń doktory, professor