Búgin Almatyda qala ákimi Baqytjan Saǵyntaevtyń jáne bilim berý uıymdarynyń birinshi basshylarynyń qatysýymen qalanyń Bilim basqarmasy alqasynyń otyrysy ótti. Júzdesýde bilim berý júıesin damytýdyń ózekti máseleleri qaraldy, dep habarlaıdy Egemen.kz
Mektepke deıingi bilim berýmen qamtýdy arttyrý boıynsha júrgizilip jatqan jumystarǵa erekshe nazar aýdaryldy. Mektepke deıingi bilim berýmen qamtýdy arttyrý boıynsha júrgizilip jatqan jumystarǵa erekshe nazar aýdaryldy.
Bala týý kórsetkishiniń joǵary bolýyna jáne belsendi kóshi-qon úderisterine baılanysty ákimniń tapsyrmasy boıynsha balabaqshalardaǵy oryn tapshylyǵy men kezek máselelerin sheshý jónindegi sharalar kúsheıtildi.
Qalalyq bilim basqarmasynyń basshysy Lázzat Jylqybaeva mektepke deıingi tárbıemen 1 jastan 6 jasqa deıingi 65 080 bala, 3 jastan 6 jasqa deıingi 57 020 bala qamtylǵanyn baıandady.
Kezekti azaıtý úshin kelesideı sharalar qabyldandy:
aǵymdaǵy jyly 670 oryndyq 4 memlekettik balabaqsha paıdalanýǵa berilip, 120 oryndyq taǵy 1 memlekettik balabaqshanyń qurylysy aıaqtalýǵa jaqyn;
"Jumyspen qamtýdyń jol kartasy" aıasynda 520 oryndyq taǵy 3 memlekettik balabaqshanyń qurylysy júrgizilýde;
bıylǵy jyly 1 378 oryndyq 48 jekemenshik mektepke deıingi uıym ashyldy.
5 jyl ishinde 360-qa jýyq jekemenshik balabaqshada 14 900 orynǵa arnalǵan memlekettik bilim berý tapsyrysyn kezeń-kezeńimen ornalastyrý josparlanyp otyr.
Sonymen qatar oryn tapshylyǵyn tómendetý maqsatynda jeke bilim berý uıymdaryna jalǵa berilgen memlekettik balabaqshalardy qaıtarý boıynsha sharalar qarastyrylǵan. Osy jumys aıasynda Áýezov aýdanyndaǵy jalǵa berilgen "Skazka" balabaqshasynyń ǵımaraty qaıtaryldy, qazir kúrdeli jóndeý júrgizilýde jáne 2021 jyly onda 320 oryndyq 14 top ashylatyn bolady.
Aıta ketý kerek, megapolıs ákiminiń bastamasymen jergilikti bıýdjet esebinen jekemenshik balabaqshalarda ata-analardyń tólemin sýbsıdııalaý boıynsha sharalar qabyldanyp jatyr.
"Jalpy qabyldanǵan sharalar esebinen 5 jyl ishinde balabaqshalarda 20 myńnan astam jańa oryn ashý josparlanýda", dep atap ótti L.Jylqybaeva.