О́tken aptada Ulybrıtanııada COVID-19 vırýsynyń jańa shtammy anyqtalýymen dúnıe dúbilip jatqanda, osy elden onyń taǵy bir túri tabyldy. Bul joly ony Ońtústik Afrıka elinen keldi degen boljam aıtylýda, dep habarlaıdy Egemen.kz
Birikken koroldiktiń Densaýlyq saqtaý basshysy Mett Henkoktyń málimdeýine qaraǵanda koronavırýstyń bul jańa shtammy eki azamattan tabylǵan jáne ol aralǵa syrttan, Ońtústik Afrıkadan kelgen. Ol ekeýi de qazir brıtandyq dárigerlerdiń jiti baqylaýynda degen mınıstr Ońtústik Afrıkadan elge ázirge adam kirgizilmeıtinin jetkizgen. Aralǵa tek Birikken korldiktiń óz azamattary men osy elge turýǵa ruqsaty bar adamdar ǵana qaıtyp kire alady. Sońǵy eki aptanyń júzinde ol elge baryp qaıtqan nemese sol jaqtan kelgen azamat bolsa, tez arada ózderin oqshaýlaý qajettigi tapsyrylǵan. Mınıstrdiń aıtýynsha «Porton-Daýndaǵy» zerthana jańa shtamdy zerttep, onyń alǵashqy qortyndylary shyqqanǵa deıin úkimet osyndaı qadamdar jasaýdy durys dep sanaıdy.
Pandemııa onsyz da álemdi ýysynda ustap turǵan ýaqytta burynǵydan da jyldamyraq juǵatyn vırýstyń jańa shtammy degen habar kári qurlyq jurtyn alańdatyp tastady. Ile-shala Eýropa memleketteri «esik-terezelerin qymtap, etek-jeńderin jıyp» degendeı Ulybrıtanııaǵa barys-kelisterdiń toqtaıtynyn aıta bastaǵanda Fransııa prezıdenti Emmanýel Makron Germanııa kansleri Angela Merkelmen jáne Eýrokomıssııa basshysy Ýrsýla fon der Lıaıenmen, Eýrokeńes tóraǵasy Sharl Mıshelmen telefon arqyly sóılesip, EO aýmaǵy boıynsha Ulybrıtanııamen aradaǵy barlyq jolaýshy, júk tasymaldaryn ýaqytsha toqtata turýda múshe-elderdiń barlyǵyna birdeı ortaq qımyl jasaý jaıynda aqyldasty. Qazirgi ýaqytta Ulybrıtaııamen áýe qatynasyn toqtatpaǵan EO ǵa múshe el joq, tipti sonaý alystaǵy Úndistan, Kanada, Túrkııa, Argentına, Iranmen qatar Reseı de ýaqytsha áýe baılanysyn úzdi. Osylaısha 35 memleket jańa shtamm shyqqan tumandy Albıonǵa aıaq baspaı otyr.
Kári qurlyqtaǵy jańa shtammnyń habary basylmaı jatyp Malaızııadan da jaısyz aqparat tarady. Eldiń Densaýlyq saqtaý mınıstri Nur Hısham Abdýlla sársenbi kúni Sabah shtatynan alynǵan 60 taldamadan COVID-19-dyń jańa modıfıkasııasy tabylǵanyn, ony A701V dep tańbalap otyrǵandy jetkizdi.
Al Ońtústik Afrıkadan Eýropaǵa jetken shtammǵa B1.351 nemese 501Y.V2 degen ataý berilgen, ol alǵash ret Nelson Mandela atyndaǵy shyǵanaqta júrgizilgen taldama barysynda qazan aıynda anyqtalǵan eken. Qazirgi kezeńde brıtandyq ǵalymdarmen qatar Ońtústik Afrıka eliniń ǵalymdary da vırýs túriniń qanshalyqty jyldam taraýy men onyń ótý barysy jaıynda zertteýler júrgizýde.
Ázirge jańa shtammdar týraly kesip-piship oı aıtýǵa bolmaıdy, olardyń vaksınaǵa qatysty da qandaı áreketi bolatyny belgisiz deıdi zertteýshiler. Biraq bir aıtarlyǵy, vırýs jyldamyraq juqqanymen onyń aýyrlyǵy burynǵylardan báseńdeý tárizdi. Jańa shtamm túrinen kóz jumý faktileri tirkelmegen.