Qaıyrymdy qoǵam

Volonterlik toptar kóbeıdi

Memleket basshysy Qasym-Jomart Toqaev Volonter jylynyń jabylý rá­siminde jalyndy jastarymyzdyń boıyndaǵy eń asyl qasıetterdi dárip­tegen erekshe jylǵa aınalǵanyn aı­ta kelip, «Bul janashyrlyqqa, jaýapker­shilik pen qamqorlyqqa úndegen kezeń boldy. Biz muqtaj jandarǵa qol ushyn berip, túrli qıyndyqtarmen birge kú­res­tik. Osylaısha adamgershilik qun­dylyqtardy joǵary baǵalaıtyn qoǵam ekenimizdi tanyttyq. Álemdi jaılaǵan indet qaıyrym men meıirimniń qanshalyqty mańyzdy ekenin anyq kórsetti», dedi. Prezıdenttiń bul sózi Volonter jylyn joǵary deńgeıde ótkergenimizdi aıǵaqtaıdy.

Memleket basshysynyń tapsyrmasyna sáıkes eldegi volonterlik qyzmetti damytý baǵytynda kóptegen sharýa at­qaryldy. Bıyl elimizdegi volonter uıy­mynyń sany 673-ke jetti. 421 uıym iri qalalarda tirkelse, aýyldyq jerler­de 197 top jumys isteıdi. Kishigirim qala­larda da volonterlik toptar bar. Olardyń jal­py sany – 55.

Aımaqtarǵa jeke toqtalar bolsaq, Qa­raǵandy oblysynda 113 volonterlik top tirkelgen. Osylaısha bul oblys respýblıka boıynsha volonterler uıymy sany bo­ıynsha kósh bastap tur. Odan keıingi satyǵa qostanaılyqtar jaıǵasty. Oblysta 102 eriktiler uıymy bar eken. Aqtóbe oblysy alǵashqy úshtikte (96). Respýblıkanyń barlyq oblysynda kórsetkish mundaı joǵary emes. Máselen, Jambyl, Soltústik Qazaqstan oblystarynda nebári 9 uıym jumys isteıdi. Al Túrkistan oblysynda 11 vo­lonterlik qaýymdastyq bar eken.

Elimizdegi volonterlik uıymdardyń baǵyty da ár alýan. Volonterlik toptar bilim berý, janýarlardy qorǵaý, tó­tenshe jaǵdaı kezinde kómek qolyn sozý, izdeý, medısınalyq járdem berý, jal­ǵyzbasty qarııalar men ardagerlerge, muq­taj otbasylarǵa qamqorlyq kórsetý, sporttyq, ekologııalyq, qaıyrymdylyq sharalar, merekeler uıymdastyrý ba­­ǵyt­tary boıynsha mashyqtanǵan. Joǵaryda aıtylǵan 673 volonterlik toptyń 248-i muqtaj otbasylarǵa arnap kıim-keshek, tur­mystyq zattar jınap, qaıyrymdylyq sharalaryn uıym­dastyrýmen aınalysady. 23 uıym pa­trıottyq baǵytta jumys isteımiz dep kór­setken, al 19 top bilim salasynda eńbek etip júr.

Bul toptar Aqparat jáne qoǵamdyq damý mınıstrligi bazasynda resmı tir­kelip, olarmen tyǵyz qarym-qatynas túz­­gen. Mınıstrlik atalǵan uıymdardan bólek, 55 myń qazaqstandyqtyń volonter ekenin de habarlap otyr. Volonterlerdiń jasy da alýan. 16-24 jas aralyǵyndaǵy eriktilerdiń úlesi 13,8 paıyz, al 25-28 jastaǵylar 10,5 paıyz. 29-34 jas aralyǵyndaǵy azamattar volonterlerdiń 22,4 paıyzyn qurasa, 35-44 jastaǵylar 20,4 paıyzdy qurap otyr. 45-54 jastaǵy eresekter de belsendilik tanytýda. Olar­dyń úlesi 22,2 paıyz. El arasynda «kúmis volon­terler» atalyp ketken egde jastaǵy erik­tiler de bar. Volonterlerdiń 10,5 pa­ıy­zyn qurap, olar da belsendi top ekenin dáleldep otyr.

Osy arada, bulardan bólek, tótenshe jaǵ­daı kezinde stýdenttik toptar, dostar men otbasy músheleri ýaqytsha birlesip, ózderi turatyn eldi mekenderde indetpen alǵy shepte kúresip júrgen qyzmet­ker­ler­­ge qolǵabys etkenin de aıta ketelik.

Salada erler men áıelder úlesinde de aıyr­mashylyq kóp emes. Volonterlerdiń 50,3 paıyzy er adam bolsa, 49,7 paıyzy – áıelder.

Jalpy, qaı elde bolsyn volonterler­diń jumys baǵyty uqsas. Olar kóbine mese­nattar men úlken qorlardan kómek alyp, kraýdfandıngke, ıaǵnı halyqtyń qol­daýyna júginedi. Elimizdegi tótenshe jaǵdaı kezinde belsendi toptar áleý­mettik jelilerde habarlandyrý jasap, bankte esepshot ashyp, halyqtyń ju­mylýyn surap, máseleni sheship jatady. Buǵan mysal da kóp. Úıinde órt shyǵyp, bir túnde 5 qyzynan aıyrylǵan Sıter otbasyna halyq jumylyp, páter alyp bergen-di. Maqtaaraldaǵy sý tas­qyny, Arys­taǵy jarylys kezinde el erikti­leriniń qyzmeti aıyryqsha kórindi.

Eriktilerdiń eńbegi eren

Elimizdegi eriktilerdiń árqaısynyń qyzmeti jeke-jeke atap ótýge turarlyq. Máselen, Arystaǵy jarylys týraly habardy estı sala oqıǵa ornyna óz erkimen attanyp, otandastaryna qaıtarymyn kútpeı qyzmet kórsetkenderdiń biri – Evgenıı Hısmetov.

Rııasyz nıeti men eńbegin Memleket basshysy joǵary baǵalap, «Qurmet» ordenimen marapattaǵan erikti Evgenıı Hısmetov arystyqtarǵa kómek berý týraly sheshimge qalaı kelgenin bylaısha áńgimelep berdi.

– Aldymen áleýmettik jelidegi vıdeolardy kórdim. Qoldaryna balalaryn ustap júgirgen áıelderdi, abdyraǵan halyq­ty kórip, olarǵa kómek berýim kerek dep sheshtim. Temir jol vokzalyna bardym. Poıyzdarda oryn, satylymda bılet joq eken. Erikti ekenimdi, eshqandaı orynnyń qajet emes ekenin túsindirip, poıyzǵa otyrdym. Balqashqa deıin oryn bolmady, tambýrda bardym. Sodan keıin bir kisiniń orny bosap, Shymkentke deıin jetip aldym... Shymkentten Arysqa baratyn joldy jaýyp tastaǵan, ol jaqqa ótkizbeıdi eken. Men qalalyq ákimdikke baryp, mán-jaıdy túsindirdim. Jolda evakýasııalanǵan adamdardy kórdim, olardyń barlyǵyn qalaǵa alyp kele jatqan edi. Arysqa jetkenimde, qalanyń tas-talqany shyqqan, úıler qulap qalǵan, tipti isherge sý bolmady. Meni meshitke or­nalastyrdy. Bir qyzyǵy, jarylys meshit janynda bolsa da Allanyń jer­degi úıine asa zaqym kelmegen. Tek tere­zeleri men esikteriniń áınegi synǵan. Al sol mańdaǵy úılerdiń kóbi qırap qalǵan.

Birinshi kezde jan-jaqtan kelgen gýma­nıtarlyq kómekti túnimen bólip daıyndap, kúndiz halyqqa taratyp júr­dim. Kóp balaly otbasylar men zeınetkerler kútip qalmasyn dep erte tu­ryp, qamdanyp, tań atpastan zattardy úlestirip otyrdym. Sodan keıin me­shit­tegi jumystarǵa atsalys­tym. Arys­­ta kún óte ystyq edi. Aınalaǵa sý shashyp, qasymdaǵylarǵa da paıdaly bo­lýǵa tyrystym. Bir apta ótken soń sý ber­di, dúkender jumysyn jalǵastyrdy. Sodan keıin jeke azamattarǵa kómektese bas­tadym. Qurylys jumystaryna, júk túsirýge qolǵabys ettim. Bir top jigit­termen tanysyp, solarmen birlesip ju­mys istedik. Keıin qurylys qoımasyn maǵan tapsyrdy. Bir ózim jumys istedim. Bes qurylys kompanııasy materıaldar alyp keletin. Ol kezde Arysta 50 úı saly­­nyp jatqan-dy. Tańǵy 8-den keshki 11-ge deıin jumys istedik. Túngi 2-den 5-ke deıingi ýaqytta qurylys zattaryn túsi­retin edim. Osylaısha, 50 kún de ótti, – deıdi Evgenıı.

Memleket te múddeli

Prezıdenttiń tapsyrmasy boıynsha azamattyq qoǵamdy damytýdy bas­ty maqsattarynyń birine aınaldyrǵan mem­leketimiz volonterlik toptarǵa da granttar bóledi. «Azamattyq bastama­lardy qoldaý» uıymynyń saıtynda jarııalanǵan konkýrstar men grant­tardyń tiziminen qandaı maqsatta qara­jat jumsalǵanyn anyq kórýge bolady.

Byltyr Qazaqstan – Reseı jastar forýmy ótip, eki el jastary tájirıbe almasyp, volonterlikke qatysty tanymyn keńeıtýge múmkindik aldy. Ile Memleket basshysy 2020 jyldy Volonter jyly dep jarııalandy. Kóp uzamaı jańa jylǵa jańa meje belgilenip, Vo­lonter jylynyń naqty jospary da­ıyn­daldy. Osy rette volonterlerdiń res­pýblıkalyq front-ofısi qyzmetin bas­tady. Jyl boıy at­qarylǵan sharalar legi gazetimizde habar­lanyp otyrdy. Jyl qorytyndylaý ke­zinde birqatar volon­ter «Halyq alǵysy» medalimen ma­rapattaldy.

Bul rette elimizdegi volonterlik má­de­nıetti qalyptastyrý, olardyń ju­mysyn bir arnaǵa keltirý boıynsha tııa­naqty eńbek etken Birgemiz front-ofısi týraly aıtyp ótelik. Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet 17 óńirlik ınfraqurylymnan turatyn Respýblıkalyq volonterler front-keńsesi volonterler jumysyn retteýge múmkindik ashqanyn aıtady.

– Volonterlik qozǵalystyń negizgi damýy osy qurylym arqyly retteledi. Sonymen qatar Qazvolunteer.kz onlaın plat­formasy iske qosyldy, onda 42 603 volonter, 3 063 uıym jáne 977 joba tirkelgen. 5 600-den astam volonter arnaıy oqýdan ótip, 50 bastamashyl top quryldy. Jalpy quny 150 mıllıon teń­geni quraıtyn 500-den astam shaǵyn grant úlestirildi, – deıdi mınıstrlik ókili.

Jyl basynda birneshe volonterdiń BUU Volonterleri qataryna tájirıbe almasýǵa jiberiletini habarlandy. Kóp uzamaı 7 qazaqstandyqtyń halyqaralyq uıymnyń qaıyrymdylyq baǵytta jumys isteıtin qurylymdarynyń qata­ryn tolyq­tyrǵany týraly habar keldi. Gazeti­mizde olardyń qalaı irikteýden ótkeni, qazir­gi qyzmeti men maqsattary týraly mate­rıaldar jaryq kórdi.

BUU Volonterler baǵdarlamasynyń atqarýshy dırektory Toıly Qurbanov­tyń aıtýynsha, halyqaralyq qurylym qataryndaǵy otandastarymyz jańa dú­nıe­ler úırenip qana qoımaı, óz táji­rı­belerimen bólisip, qazaqstandyq modeldi de tanytýda.

Jalpy, Volonter jylynyń pandemııamen tuspa-tus kelýi halyqqa eriktilik qyzmetiniń asa mańyzdy ekenin jete túsinýge múmkindik berdi. «Jumyla kó­ter­gen júktiń de jeńil bolatynyn» aı­qyndap berdi. Eriktilikti ómir saltyna aınaldyrýǵa asyqqandar qatary tolyǵa tústi.