«Aq jol» demokratııalyq partııasynyń úgit-nasıhat toby elordalyq saılaýshylarmen kezdesti. Nur-Sultan qalasynda ótken jıynǵa partııa atynan Parlament Májilisi depýtattyǵyna úmitkerler qatysty.
Olar azamattarmen kezdesip, partııanyń saılaýaldy baǵdarlamasyn tanystyrdy. Aqjoldyqtardyń aıtýynsha, áleýmettik ádilettilik el azamattarynyń sapaly bilim berý men medısınaǵa, turǵyn úı jáne jumys oryndaryna qoljetimdiligimen aıqyndalady. Bul salalar qarjylandyrýdyń jetispeýshiligi men jemqorlyqtyń kesirinen kesheýildep keledi. Áleýmettik ádilettilikti qamtamasyz etý úshin partııa belsendileri elde birneshe shara qolǵa alynýy kerek degen senimde. Máselen, ıpoteka, tutyný taýarlary úshin, shaǵyn jáne orta bızneske beriletin nesıelerdiń paıyzdyq mólsherlemesi 7-8 paıyzdan aspaýy kerek. Turǵyndardy kollektorlardan qorǵaý úshin «Jeke tulǵalardyń bankrottyǵy týraly» zań qabyldanýy kerek. Partııa ókilderi ózge usynystaryn ortaǵa saldy.
Odan bólek partııanyń respýblıkalyq shtaby azamattardy qabyldady. Parlament Májilisiniń depýtattary, «Aq jol» partııasynan depýtattyqqa kandıdattar Qoǵamdyq qabyldaý bólmesine kelgen turǵyndardyń ótinish-tilekterin tyńdady. Qabyldaýǵa kelgenderdiń kóbi jeke máselelerin kóterdi.
Depýtat Erlan Barlybaevqa gazdandyrý máselesi boıynsha Nur-Sultan qalasy N.Ahmetbekov jáne О́.Jánibek kósheleriniń turǵyndary atynan M.Rahymǵulov júgindi. Turǵyndardy jumystyń baıaý júrip jatqany alańdatqan eken. Olar jergilikti bıliktiń tıisti baqylaýdy júrgizbeı, gazdandyrýdy aıaqtaýǵa qyzyǵýshylyq tanytpaı otyrǵanyna shaǵymdandy.
Qaraǵandy qalasynyń turǵyny M.Myrzahanova depýtat Danııa Espaevaǵa otbasynyń qaryzdary boıynsha júgindi. Qazirgi ýaqytta barlyq tabys nesıelerdi óteýge jumsalady, al otbasynyń ómir súrýine aqsha jetpeıdi eken. Al mıkrokredıttik uıymdar qaryzdardy óteý sharttaryn qaıta qarastyrmaı otyr. «Jeke tulǵalardyń bankrottyǵy týraly zań bolǵan jaǵdaıda mundaı problema sonshalyqty ótkir bolmas edi. Mundaı jaǵdaıda bankrottyqty basqarýshylar tabysty proporsıonaldy túrde bóler edi: 50% – kredıtterdi óteýge, 50% – otbasynyń turmys-tirshiligine. Mundaı ótinishter, ásirese pandemııa kezeńinde kóbeıip keledi. Bizdiń partııa qatardaǵy azamattardyń múddelerin qorǵaý boıynsha jumysty jalǵastyrady. Biz jeke tulǵalardyń bankrottyǵy týraly zańnyń qabyldanýy úshin qolymyzdan kelgenniń bárin jasaımyz. «Aq jol» partııasy mundaı zań jobasyna bastamashy boldy, biraq ókinishke qaraı, qoldanysqa enbedi», dep atap ótti D.Espaeva.
Depýtat Merýert Qazbekovaǵa turǵyn úı máselesimen astana turǵyny Raıhan Kamalova keldi. Onyń aıtýynsha, turǵyn úı kezegine tura almaı keledi. Sebebi turǵynnyń zeınetaqysy eń tómengi kúnkóris deńgeıinen joǵary. «Partııa tıisti ınstansııalarǵa resmı túrde júginetin bolady. Sodan keıin biz osy másele boıynsha, onyń ishinde Memlekettik baǵdarlamalar krıterııleri boıynsha anyqtyqty engizý úshin memlekettik organdardyń ókilin kezdesýge mindetti túrde shaqyramyz», dep atap ótti M.Qazbekova.
Demokratııalyq partııanyń zań qyzmeti kelip túsken barlyq ótinishterdiń qaralatynyn aıtyp sendirdi. Tıisti qurylymdarǵa hattar jiberiledi, sondaı-aq bul máseleler partııanyń aldaǵy jumysynda qarastyrylatyn bolady.