Qazaqstanda egistikterde sý tapshylyǵyn boldyrmas úshin sý shyǵynyn esepteýdiń sıfrly ádisin engizý qajet. Bul týraly búgin Ortalyq kommýnıkasııalar qyzmetindegi Memleket basshysynyń Joldaýyndaǵy tapsyrmalardy oryndaýǵa arnalǵan is-sharalar týraly brıfıngte Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy Egemen.kz
«Memleket basshysy Joldaýynda aıtqandaı, búginde sýarý kezinde sýdy joǵaltýdyń úlesi 40%-dy quraıdy. Sýdy esepteý men sıfrlandyrýdan bólek, munda fermerlerdiń túsinistikpen qaraýy da mańyzdy, olar sýdy únemdep paıdalanýy qajet», dedi mınıstr.
Sý joǵaltýdy boldyrmas úshin mınıstrlik ákimdiktermen birge vegetasııalyq kezeńge saraptama júrgizgen. Saraptama nátıjesi 2030 jylǵa qaraı egistik alqaby 3 mln gektarǵa ulǵaıatynyn eskere otyryp, sý tapshylyǵyn boldyrmaý sharalaryn qabyldaý qajettigin kórsetken.
«Sý tapshylyǵyn joıý úshin ońtústik aımaqtarda sýdy kóp qajet etetin daqyldar alqabyn birtindep azaıtý qajet. Sonymen birge jańa sý qoımalary salynady. Qoldanystaǵy kanaldar jóndelip, sý esepteý júıesi sıfrlandyrylady. Sýarýdyń únemdeý tehnologııasyn qoldanbasaq egistik alqaptary kólemin ulǵaıtý múmkin emes. Sýdy únemdep paıdalaný maqsatynda 2,8 shaqyrym 119 negizgi kanalda 2025 jylǵa deıin sý esepteýdiń sıfrlandyrylǵan ádisin engizý jumysy jalǵasady», dedi Ekologııa mınıstri.
Atalǵan sharalar qosymsha 8,3 kýb km sý jınaýǵa jáne 1 gektar jerge ketetin sý kólemin 8,8-den 6,6 myń kýb metrge azaıtýǵa múmkindik bermek.