Aqparat máseleleri jáne qoǵamdyq keńesterdiń qyzmeti týraly zańdarǵa engizilgen jańa tolyqtyrýlar men qoǵamdyq baqylaý týraly zań jobasyn túsindirý jumystary boıynsha Aqparat jáne qoǵamdyq damý mınıstri Aıda Balaeva jumys saparymen Atyraý oblysyna bardy.
Sapar barysynda mınıstr oblys basshylyǵymen, ishki saıasat, jastar saıasaty, din isteri basqarmalarynyń basshylarymen, sondaı-aq jergilikti buqaralyq aqparat quraldary, úkimettik emes uıymdar jetekshilerimen, áleýmettik kásipkerlikpen aınalysatyn qoǵamdyq uıymdarmen jáne volonterlermen kezdesti.
Atyraý oblysy jurtshylyǵy ókilderimen kezdesý barysynda mınıstr Memleket basshysy qol qoıǵan jańa zańdar memlekettik organdar qyzmetiniń de, kvazımemlekettik uıymdar jumysynyń da ashyqtyǵyn arttyrýdaǵy mańyzdy qujat ekendigin atap ótti. «Zańnamalyq ózgerister «Halyq únine qulaq asatyn memleket» tujyrymdamasyn júzege asyrýǵa yqpal etedi», dedi A.Balaeva.
Eske sala keteıik, 2020 jylǵy 30 jeltoqsanda Memleket basshysy «Qazaqstan Respýblıkasynyń keıbir zańnamalyq aktilerine aqparat máseleleri boıynsha ózgerister men tolyqtyrýlar engizý týraly» Zańǵa qol qoıdy. Mınıstrdiń aıtýynsha, túzetýlerge memlekettik aqparattyq tapsyrys berýdiń jańa erejeleri engizilgen. Olar respýblıkalyq jáne aımaqtyq deńgeılerde jalpy taqyryptyq baǵyttardy aıqyndaýdy qarastyrady. Sonymen qatar osy jyldyń 3 qańtarynda Memleket basshysy «Qazaqstan Respýblıkasynyń keıbir zańnamalyq aktilerine qoǵamdyq keńesterdiń qyzmeti máseleleri boıynsha ózgerister men tolyqtyrýlar engizý týraly» Zańǵa qol qoıdy. Osy zańǵa sáıkes Aqparat jáne qoǵamdyq damý mınıstrligi qoǵamdyq keńesterdiń qyzmetin úılestirip, ádistemelik qoldaý kórsetedi.
Qazaqstanda qoǵamdyq keńester 2015 jyldan bastap jumys isteıdi, al jańa túzetýler qoǵamdyq keńester qurý men olardyń jumys isteý tetikterin jetildirýge jan-jaqty múmkindik beredi. Sóıtip, qazir qoǵamdyq keńesterge NQA jobalary men úndeýlerdi olardyń qoǵamdaǵy ózektilikke sáıkes qaraý týraly sheshim qabyldaýǵa ókilettik berildi.
Oblys aktıvimen kezdesýde A.Balaeva azamattyq qoǵam ınstıtýttaryn memlekettiń sheshim qabyldaý prosesterine tartýdyń kelesi maqsatty qadamy «Qoǵamdyq baqylaý týraly» Zań jobasy bolatynyn atap ótti. «Qurylymdy qalyptastyrýshy Zań qoǵamdyq baqylaýdyń júıelenýine jáne tıimdiligin arttyrýǵa múmkindik beredi», dedi ol.
Oǵan qosa, ABalaeva aımaq jurtshylyǵy ókilderine «petısııa» uǵymyn engizý men ony qaraý tártibin retteıtin normatıvtik-quqyqtyq baza ázirlenip jatqanyn aıtty. Sonymen birge jumys sapary barysynda mınıstr Atyraý oblysy Din isteri basqarmasynyń «Aqparattyq taldaý ortalyǵy» KMM, Atyraý oblysy Ishki saıasat basqarmasynyń «Azamattyq ortalyǵy» KMM jáne oblystaǵy áleýmettik kásipkerlikti damytý máselelerimen aınalysatyn «Móldir kóz» qoǵamdyq birlestiginiń jumysymen tanysty.
Atyraý oblysy