Senat depýtaty Lázzat Súleımen Prezıdent Qasym-Jomart Toqaevtyń «Egemen Qazaqstan» gazetinde jarııalanǵan «Táýelsizdik bárinen qymbat» atty maqalasyna qatysty pikir bildirdi, dep habarlaıdy Egemen.kz.
Qasym Jomart Kemeluly Toqaev Prezıdent bolǵan kúnnen bastap salıqaly, ashyq saıasat júrgizip keledi. "Táýelsizdik bárinen qymbat" maqalasymen de Memleket basshysy kúrmeýi qıyn máselelerdi eńserý joldary týraly batyl oılarymen bólisip otyr dep esepteımin.
Alǵashqy nazar aýdarǵanym - jetistikterimiz ben kemshilikterimizdi oı eleginen ótkizýdiń mańyzdylyǵy týraly pikiri. Táýelsizdigimiz tuǵyrly bolýy, memleketimizdi saqtaý úshin biz jetistikterimizdi baǵalaı alatyn, kemshilikterimizge týra qarap, túzetýdiń joldaryn paıymdaýǵa qabiletti qoǵam bolýymyz shart.
Ekinshiden, azamattarymyzdyń ekonomıkalyq ósimniń ıgiligin sezine almasa, odan qaıyr joq,- dep tikeleı aıtýy. Bul baǵytta qoǵam kútkendeı sheshimder qabyldaý mańyzdy. Al naqty atqarylyp jatqan ister de az emes. Mysaly, elmen kezdesýlerde muǵalimder otbasynyń qazirgi ýaqytta 600 myńnan astam jalaqy alatynyn aıtqanda, olarmen birge qýandyq.
Elbasy N.Á. Nazarbaevtyń kóshbasshylyǵymen tabysty ótken úsh onjyldyqtyń berekesin bekemdep, tórtinshi onjyldyqta qýatty el, jetilgen ult bolýdy Q.Toqaev basty maqsat - ulttyq ıdeıa deńgeıine kóterip otyr dep túsinemin. Memleket basshysy ol úshin saıası jáne ekonomıkalyq reformalar men sanany jańǵyrtý úderisin jalǵastyrý, ulttyń zamanaýı talaptarǵa beıimdelgen jańa biregeıligin qalyptastyrý qajet ekenin atap ótti. Al bul bıikke qazaqstandyqtardyń, memlekettiń, qoǵamnyń birlesken is-qımylynyń nátıjesinde ǵana qol jetkizýge bolady. Memleket basshysynyń - eldi súıý, jerdi saqtaý, qazaqtyń tilinde sóıleý jáne ár azamattyń eldiń damýy men órkendeýine at salysýy týrasynda aıtqany - taǵdyrsheshti mańyzǵa ıe.
Prezıdenttiń memlekettik tildi bilý týraly oı-pikiriniń oryndalýynyń basty joly "qazaqtyń qazaqpen qazaqsha sóılesýi". Ony ár azamat óz jaýapkershiligine almaı, nátıjeniń bolýy ekitalaı ekenin ýaqyt ta kórsetti. Muny qazaq eli azamattarynyń túsinetin ýaqyty baıaǵyda jetti dep sanaımyn. Árqaısymyz óz otbasymyzda, óz balalarymyzben, aǵaıyn-týys, kórshi-qolań, baýyrlarymyzben qazaqsha sóılesý jaýapkershiligin óz moıynymyzǵa alýymyz kerek, eshkimdi aıyptamaı, dostyq kóńilmen aıtylǵan aýyzeki áńgimeniń ózi alǵa ilgerileýshilik bolar edi.
Sonymen birge Prezıdent Q.Toqaevtyń maqsaty - halyq únine qulaq asatyn memleket, ádiletti, zaıyrly qoǵam qurý. Bul bizdiń qoǵamnyń da ortaq maqsatyna aınalýǵa tıis.