Kólik mınıstrligi jolaýshylardy avtomobılmen tasymaldaý salasyndaǵy normatıvtik quqyqtyq aktilerge ózgerister engizýdi kózdeıtin buıryq jobasyn ázirledi. Qujat múmkindigi shekteýli jandar úshin kólik qoljetimdiligin arttyrýǵa, qyzmet sapasyn jaqsartýǵa jáne talaptardy qazirgi jaǵdaıǵa beıimdeýge baǵyttalǵan, dep jazady Egemen.kz.
Jobada ınvataksı qyzmetine qatysty birqatar mańyzdy ózgeris qarastyrylǵan. Eń aldymen, ınvataksı qyzmetin alýshylar sanaty naqtylanady. Ol úshin arnaıy tizim jasalyp, onda qyzmetke quqyq beretin medısınalyq kórsetkishter naqty belgilenedi. Bul qyzmet alýshylardy anyqtaý turǵysynda biryńǵaı tásil qalyptastyrýǵa múmkindik beredi.
Sonymen qatar jergilikti atqarýshy organdardyń ókilettigi keńeıtilip, ınvataksımen sapar uzaqtyǵyn óz betinshe aıqyndaý múmkindigi beriledi. Mundaı sheshim óńirlerdegi naqty qajettilikterdi eskerip, retteýdi ıkemdi júrgizýge jol ashady.
Invataksı qyzmetine shaǵym joq
Qujatta 18 jasqa tolǵan múgedektigi bar azamattardy jeke kómekshilerdiń alyp júrý múmkindigin bekitý de kózdelgen. Bul olardyń kúndelikti qozǵalysyn jeńildetýge baǵyttalǵan.
Avtomobıl kóligimen jolaýshylardy tasymaldaý qaǵıdalary da jańartylady. Atap aıtqanda, qoǵamdyq kóliktiń júktemesi joǵary bolǵan jaǵdaıda balalar arbalaryn alyp júrý tártibi naqtylanyp, avtobýstardaǵy baǵyttyq kórsetkishterdi rásimdeýge qoıylatyn talaptar ózektendiriledi.
Konkýrstyq rásimderdi jetildirý aıasynda tasymaldaýshylardy baǵalaýdyń jańa ólshemsharttary engiziledi. Onyń ishinde elektrli jáne gıbrıdti avtobýstardy paıdalaný yntalandyrylady. Bul qadam jyljymaly quramdy jańartýǵa jáne qorshaǵan ortaǵa túsetin júktemeni azaıtýǵa baǵyttalǵan.
Igilikke aınalǵan ınvataksı
Sondaı-aq óńirlerdegi avtovokzaldardyń ataýy men ornalasqan jeri naqtylanyp, tekseriletin kólik ınfraqurylymy nysandarynyń tizimi jańartylady.
Atalǵan buıryq jobasy 2026 jylǵy 8 sáýirde «Ashyq NQA» ınternet-portalynda jarııalanyp, kópshilik talqylaýyna usynyldy.