Shymkentte elimizdiń bolashaq qorǵaýshylaryn áskerı esepke turǵyzý bastaldy. Bul is-shara 5 qańtardan 31 naýryzǵa deıin er azamattardy áskerı esepke alý jáne olardyń áskerı qyzmetke jaramdylyq dárejesin anyqtaý, bilim deńgeıin, alǵan mamandyǵy men dene daıarlyǵyn belgileý úshin ótkiziledi, dep habarlaıdy Egemen.kz.
«Osy jyly Shymkentte 5 myńnan astam jasóspirimdi áskerı esepke qoıý josparlanǵan. Árbir adam turǵylyqty jeri boıynsha jergilikti áskerı basqarý organyna júginip, tolyq aqparat ala alady», - dep túsindirdi Shymkent qalasynyń qorǵanys isteri jónindeg departament bastyǵynyń orynbasary polkovnık Ajımýhan Shyntaev.
Kún saıyn qalanyń jergilikti áskerı basqarý organdaryna medısınalyq tekserýden ótý úshin mektep jáne arnaıy orta oqý oryndarynyń oqýshylary keletin bolady. Josparǵa sáıkes qorǵanys isteri jónindegi biriktirilgen basqarmalary kúnine 100-ge jýyq adamdy qabyldaý kerek. Aldymen jigitter áskerı qyzmetke jaramdylyǵyn dáleldeıtin medısınalyq tekserýden jáne qajetti qujattardy tekserýden ótedi. Eger esepke alý barysynda emdelýge nemese medısınalyq baqylaýǵa muqtaj áskerge shaqyrý jasyna deıingiler anyqtalsa, onda olar emdeý-profılaktıkalyq uıymdaryna tirkeledi.
Aıta ketsek, azamattardy shaqyrý ýchaskelerine esepke alý jumystary jergilikti atqarýshy organdary jergilikti áskerı basqarý organdarymen birlesip júrgizedi.
«Áskerı qyzmet jáne áskerı qyzmetshilerdiń mártebesi týraly» Qazaqstan Respýblıkasynyń Zańyna sáıkes áskerı esepke 17 jasqa tolǵan nemese sol jyly tolatyn Qazaqstan Respýblıkasynyń er azamattary jatady.
Barlyq is-sharalardan keıin, jastarǵa áskerı shaqyrý ýchaskesine tirkeý týraly kýálik beriledi. Bul kýálik áskerge shaqyrý kezinde shaqyrylýshynyń esepte turǵanyn rastaıtyn qujat bolyp tabylady.
Áskerı esepke alǵash turǵan azamattarmen qosymsha Qorǵanys mınıstrliginiń áskerı oqý oryndaryna túsý boıynsha aqparattyq jumys júrgiziledi jáne kelisimshart boıynsha áskerı qyzmettiń artyqshylyqtary túsindiriledi.