Senat depýtattary Baqytjan Jumaǵulov pen Nurlan Bekenov Aqmola oblysynda boldy, dep habarlaıdy Egemen.kz.
Senatorlar sapar barysynda Býrabaı aýdanyndaǵy oqý oryndarynda, onyń ishinde daryndy balalarǵa arnalǵan mektepte, Aqkól aýdanynda ornalasqan «Smart Aqkol-2018» demonstrasııalyq-ahýaldyq ortalyǵynda jáne basqa da birqatar áleýmettik mańyzdy obektilerde boldy.
Depýtattar sońǵy talaptarǵa saı jabdyqtalǵan bilim berý uıymdarynyń jumysymen tanysyp qana qoımaı, ondaǵy qyzmetkerlermen, ustazdarmen ózekti máseleler boıynsha pikir almasty.
Sonymen qatar senatorlar ustazdarǵa ótken jyldyń sońynda Parlament qabyldaǵan «Bilim týraly» Zańǵa engizilgen mańyzdy ózgerister men tolyqtyrýlar, onyń ustazdar qaýymyna paıdasy jóninde ashyp aıtyp berdi.
Senatorlar odan ári Respýblıkalyq ǵaryshtyq baılanys ortalyǵynda boldy. Mekeme dırektory búginde 52 ınjeneri bar ortalyqtyń jumysymen tanystyrdy.
Sapar barysynda depýtattar óńir basshylarymen kezdesip, turǵyndardyń áleýmettik jaǵdaılaryn jaqsartý, óńirdi damytý boıynsha óz usynystaryn jetkizdi.