Elbasynyń baspasóz qyzmetiniń Yoytube arnasynda Nursultan Nazarbaevtyń «Shtrıhı k portretý» derekti fılminiń úshinshi bólimi jarııalandy. Derekti fılmde Elbasy astana ataýyn aýystyrýǵa qatysty pikir bildirdi dep habarlaıdy Egemen.kz tilshisi.
«Prezıdent qyzmetinde bolǵanymda men buǵan árqashan qarsy bolyp, túbegeıli tyıym salǵanmyn. Táýelsizdiktiń ár kúni nemese meniń týǵan kúnimde meniń atymdy kóshege, mektepke bergisi kelgender boldy. Men támamdaǵan Abaı mektebin meniń atyma qalaı aýystyrýǵa bolady? Bul sózsiz qate ǵoı. Buǵan tyıym saldym. Muny bilesizder. Kelisim bergenim - ýnıversıtet ataýy. Bul mańyzdy, álemge qarasańyzdar, barlyq ýnıversıtet sol oqý ornyn kim qalasa sonyń atymen atalady. Ideıasyn aıtyp, Nazarbaev ýnıversıtetin qurdym. Birinshiden, sol jaqqa tartý úshin kelistim, ekinshiden jastar oqýǵa qyzyqsyn dedim. Men kelisim bergen jalǵyz nysan osy. Qate jasaǵan bolsam, aıyptymyn, moıyndaımyn», - dedi Nursultan Nazarbaev «Shtrıhı k portretý» derekti fılminiń úshinshi serııasynda.⠀Nazarbaevtyń aıtýynsha, qalǵan nysandarǵa esimin berý onyń kelisiminsiz bolǵan.⠀«Táýelsizdikke 25 jyl tolǵan kezde de Parlament elordany Nur-Sultan dep ataý týraly bastama kótergen bolatyn. Buryn qala Aqmola dep atalǵan. Astanany halyqaralyq deńgeıde tanystyrý mindeti tur edi. Qonaqtardy shaqyrdyq. Aqmola dep ataý týrasynda da ártúrli pikir bolǵandyqtan, oıyma elordany Astana dep ataý týraly ıdeıa keldi. Bul – jańashyldyq emes. Mysaly, Beıjiń degen sóz de Soltústik Astana degendi bildiredi. Sondaı mysal kóp. Astana degen ataý jaqsy sińisip, adamdar da, álem de úırendi. Esterińizde bolsa, ulyqtaý rásiminde Qasym-Jomart Kemeluly Toqaev usynys jasady: osy qalany qurǵan adamǵa, qurylysyna uıytqy bolǵan adamǵa Nur-Astana nemese Nur-Sultan dep qala ataýyn ózgerteıik dep usynys jasady», - dedi ol.⠀