Qańtardyń alǵashqy onkúndiginde elorda «sary» jáne «qyzyl» aımaqtardyń shekarasynda tur. Jańa jyldyq merekelerden keıin ınkýbasııalyq kezeń aıaqtalǵanyn eskere otyryp, koronavırýspen aýyratyn naýqastar sany artyp keledi. Bul — sanıtarlyq normalardyń bári birdeı saqtalmaǵanynyń basty belgisi. Bul týraly qalanyń bas sanıtarlyq dárigeri Sarhat Beısenova málimdedi, dep habarlaıdy Egemen.kz.
«Qazir qala «sary aımaqta» ornalasqanyna qaramastan syrqattanýshylyq sanynyń ósýi baıqalady. Bul, bir jaǵynan, COVID-19 ınfeksııasyna test tapsyratyn adam sanynyń eki ese ósýine, al ekinshi jaǵynan qala turǵyndarynyń merekelik jańa jyl kúnderinde shekteý sharalaryn saqtamaýyna baılanysty.
Sondaı-aq aıryqsha atap óterligi – dárigerlerge ózdiginen qaralatyn halyqtyń úlesi artyp keledi. Bul turǵyndardyń jaýapkershiligi joǵary ekenin jáne koronavırýs ınfeksııasynyń saldaryna alańdaıtynyn kórsetedi. О́z betimen em-dom qoldanýǵa bolmaıdy. О́zin, týystaryn jáne aınalasyn qorǵaý úshin sanıtarlyq normalardy qatań saqtap, maska taǵý qajet», dedi elordanyń bas sanıtarlyq dárigeri Sarhat Beısenova.
Qalanyń bas sanıtarlyq dárigeri Sarhat Beısenova koronavırýspen aýyrǵandardyń ósýi jalǵasqan jaǵdaıda karantındik qosymsha shekteý sharalary qabyldanatynyn atap ótti.